Gujarati News

મુંબઈ, તા.૨૮ : કોરોનાની પ્રથમ લહેર દરમિયાન ઘણાં બોલિવૂડ સેલેબ્સ સંક્રમિત થયા હતા. ત્યારપછી દેશભરમાં કોરોનાના કેસમાં ઘટાડો જોવા મળ્યો હતો. હવે જ્યારે દુનિયાભરમાં નવા વેરિયન્ટની ચર્ચા ચાલી રહી છે ત્યારે બોલિવૂડથી પણ કોરોના પોઝિટિવ કેસ સામે આવી રહ્યા છે. બોલિવૂડ અભિનેત્રી કાજોલની નાની બહેન તનિષા મુખર્જીનો કોરોના રિપોર્ટ પોઝિટિવ આવ્યો છે.

તનિષા મુખર્જીએ સોશિયલ મીડિયાના માધ્યમથી ફેન્સને આ વાતની જાણકારી આપી છે. ઉલ્લેખનીય છે કે ફરી એકવાર બોલિવૂડ સેલેબ્સને કોરોના થયો હોવાની ખબરો સામે આવી રહી છે. આ પહેલા અભિનેત્રી ઉર્મિલા માતોંડકર અને સાઉથ એક્ટર કમલ હસન કોરોના સંક્રમિત થયા હોવાના સમાચાર મળ્યા હતા. તનીષાએ પોતાના ઈન્સ્ટાગ્રામ હેન્ડલ પર સ્ટોરીમાં લખ્યું છે કે, હું કોરોના સંક્રમિત થઈ છું અને થોડા દિવસ હવે મારે આઈસોલેશનમાં રહેવાની જરુર છે.

ઉલ્લેખનીય છે કે કોરોના મહામારીને કારણે બોલિવૂડની ઘણી ફિલ્મોના શૂટ ખોરંભે પડી ગયા હતા. પરંતુ કોરોનાની બીજી લહેર દરમિયાન તનિષાએ લખનઉમાં એક ફિલ્મ માટે શૂટિંગ કર્યુ હતું. વર્ક ફ્રંટની વાત કરીએ તો તનિષાએ વર્ષ ૨૦૦૩માં બોલિવૂડમાં એન્ટ્રી કરી હતી. ત્યારપછી તે નીલ એન્ડ નિક્કી, સરકાર, સરકાર રાજ અને ટેંગો ચાર્લી જેવી ફિલ્મોમાં કામ કરી ચૂકી છે. અત્યારે તનીષા મુખર્જી પોતાની અપકમિંગ ફિલ્મ કોડ નેમ અબ્દુલ માટે કામ કરી રહી છે. આ ફિલ્મમાં તે એર રૉ એજન્ટના રોલમાં જોવા મળશે. ઉલ્લેખનીય છે કે તનીષા મુખર્જી બિગ બોસમાં પણ ભાગ લઈ ચૂકી છે.

નોંધનીય છે કે કોરોનાના નવા વેરિયન્ટને કારણે દુનિયાભરમાં હડકંપ મચી ગયો છે.

આ વેરિયન્ટ અન્ય દેશોમાં ફેલાય નહીં તે માટે દેશો સાવધાની વર્તી રહ્યા છે. અનેક દેશોએ દક્ષિણ આફ્રિકાથી આવતી ફ્લાઈટ પર પ્રતિબંધ મૂકી દીધો છે.