Gujarati News

Gujarati News

News of Tuesday, 29th September 2020

હેવાનિયત : ૬૦ વર્ષીય ડોકટરે દૂધમાં નશીલો પદાર્થ મેળવી ૭ અને ૩ વર્ષની બાળકીઓને પીવડાવ્યું, પછી આચર્યું દુષ્કર્મ

પોલીસે પોકસો એકટ હેઠળ કેસ નોંધી આરોપી ડોકટરની ધરપકડ કરી : ૧૪ દિવસની જ્યુડિશિયલ કસ્ટડીમાં

દહેરાદૂન તા. ૨૯ : ઉત્તરાખંડના પાટનગર દેહરાદૂનમાં એક ચોંકાવનારી ઘટના સામે આવી છે. અહીં ૬૦ વર્ષના એક ડોકટર પર ૩ વર્ષ અને ૭ વર્ષની બે માસૂમ બાળકીઓ સાથે દુષ્કર્મ આચરવાનો આરોપ છે. આરોપી પોતાને વ્યવસાયે ડોકટર હોવાનું જણાવે છે. તેણે દૂધમાં બેભાન કરવાની દવા મેળવી માસૂમો સાથે દુષ્કર્મ આચર્યું. બંને માસૂમોની હોસ્પિટલમાં સારવાર ચાલી રહી છે. બીજી તરફ, મામલાની ગંભીરતાને જોતાં પોલીસે પોકસો એકટ હેઠળ કેસ નોંધી આરોપી ડોકટરની ધરપકડ કરી કોર્ટમાં રજૂ કર્યો, જયાંથી તેને ૧૪ દિવસની જયૂડિશિયલ કસ્ટડીમાં ધકેલી દેવામાં આવ્યો છે.

મળતી જાણકારી મુજબ, આ મામલો પટેલ નગર પોલીસ સ્ટેશનની હદનો છે. અહીં એક તથાકથિત ૬૦ વર્ષના ડોકટર ભારત ભૂષણ પર દૂધમાં નશીલો પદાર્થ મેળવીને ૭ અને ૩ વર્ષની બે બહેનો સાથે દુષ્કર્મ આચરવાનો આરોપ લાગ્યો છે. આરોપી ડોકટરના ઘરમાં એક મહિલા પોતાની બે દીકરીઓ સાથે રહેતી હતી. તે મહિલા આ ડોકટરના ઘરનું કામકાજ પણ કરતી હતી. રવિવારે મહિલા પોતાના પરિચિતના ઘરે ગઈ હતી. તે સમયે ભારત ભૂષણે બંને માસૂમોને દૂધમાં બેભાન થવાની દવા મેળવીને પીવડાવી દીધું. જયારે બંને બેભાન થઈ ગઈ તો આરોપીએ તેમની સાથે દુષ્કર્મ કર્યું.

પીડિતાની માતાનું કહેવું છે કે તે એક વાગ્યે જયારે ઘરે પહોંચી તો તેણે જોયું કે તેની બંને દીકરીઓ બેભાન પડી છે. તેને આ હાલતમાં જોઈ માતાએ ડોકટરને તે અંગે પૂછ્યું તો તેણે કહ્યું કે તેની પર કોરોના સંક્રમણ છે. હું જોઈ લઈશ, તું રહેવા દે. પરંતુ માતાએ બાળકીઓને સારવાર માટે હોસ્પિટલમાં દાખલ કરાવી, જયાં જાણવા મળ્યું કે તેમની સાથે દુષ્કર્મ થયું છે. ત્યારબાદ પીડિત માતાએ પોલીસને ઘટનાની જાણ કરી.

બીજી તરફ, મામલાની જાણ થતાં પોલીસ ઘટનાસ્થળે પહોંચી ગઈ અને ડોકટરની ધરપકડ કરી લીધી. મામલામાં એએસઆઈ ભુવન ચંદ પૂજારીનું કહેવું છે કે જેવી મામલાની ફરિયાદ મળી, પ્રાથમિક તપાસમાં આરોપી પરના આરોપ સાચા હોવાનું સામે આવ્યું. ત્યારબાદ ઘરે જઈને પોલીસે આરોપી ડો. ભારત ભૂષણને પોકસો એકટમાં ધરપકડ કરીને કોર્ટમાં રજૂ કર્યો, જયાંથી તેને ૧૪ દિવસની જયૂડિશિયલ કસ્ટડીમાં મોકલવામાં આવ્યો છે.

(10:13 am IST)
  • જમ્મુ-કાશ્મીરના અનંતનાગમાં ત્રાસવાદીઓ સાથેની અથડામણ ચાલુઃ ત્રાસવાદીઓને ઘેરી લેવાયા access_time 4:04 pm IST

  • તામિલનાડુમાં 31 ઓક્ટોબર સુધી લોકડાઉન : થોડી છૂટછાટ સાથે લોકડાઉન આખા ઓક્ટોબર માસ સુધી અમલી બનાવાયું access_time 7:49 pm IST

  • બિહારમાં ગઠબંધનનો દોર શરૂ :પપ્પુ યાદવની જન અધિકારી પાર્ટી, ચંન્દ્રશેખર આઝાદની આઝાદ સમાજ પાર્ટી, બીએમપી અને સોશિયલ ડેમોક્રેટિક પાર્ટી ઓફ ઈન્ડિયાએ સાથે મળીને પીડીએ( પ્રોગ્રેસિવ ડેમોક્રેટિક અલાયંસ) બનાવ્યુ: રાલોસપાના અધ્યક્ષ ઉપેન્દ્ર કુશવાહ સાથે વાતચીત ચાલુ: લોજપા અને કોંગ્રેસને પણ ગઠબંધનમાં સામેલ થવા કહેણ : પપ્પુ યાદવે કહ્યું રાજ્યમાં ચાલી રહેલા 30 વર્ષનું મહાપાપ હવે ખતમ થશે access_time 12:53 am IST