Gujarati News

નાગપુર તા. ૨૯ : શું તમે કયારેય ટોઈલેટનું પાણી ખરીદવા અથવા વેચવાનું વિચાર્યું છે ? તમને આ જાણીને નવાઈ લાગશે પરંતુ ટોઈલેટનું પાણી ખૂબ જ કામમાં આવે છે. આ પાણીથી તમે સારા રૂપિયા કમાઈ શકો છો. આવી જ રીતે નાગપુરની એક સરકારી એજન્સીએ ટોઈલેટના પાણી દ્વારા કરોડો રુપિયાની કમાણી કરી છે.

તમે જે ટોઈલેટના પાણીને નકામુ સમજીને ગટરમાં વહેવા દો છો તે જ પાણીને નાગપુરમાં સરકારી એજન્સીએ ૭૮ કરોડ રુપિયામાં વેચ્યું છે. હવે આ જ પાણીથી શહેરમાં ૫૦ એસી બસો ચલાવવામાં આવી રહી છે. કેન્દ્રિય પરિવહન મંત્રી નિતિન ગડકરીએ જણાવ્યું કે નાગપુરમાં વૈકલ્પિક ઈંધણને લઈને પણ અનેક પ્રયોગ કરવામાં આવી રહ્યાં છે. જેમાંથી એક ટોઈલેટના પાણીમાંથી બાયો સીએનજી નીકાળીને તેનાથી બસ ચલાવવાની યોજના છે. હાલ એવી પચાસ બસો રસ્તા પર દોડી રહી છે.

ગડકરીએ એ પણ જણાવ્યું કે પેટ્રોલિયમ મંત્રાલયને આધિન રહીને કામ કરનાર ગેસ કંપનીઓ સાથે એક કરાર કરવામાં આવ્યો છે. જેની હેઠળ ગંગા કિનારે વસેલા તમામ ૨૬ શહેરોને લાભ મળશે. તેમણે જણાવ્યું કે પાણીની ગંદકીમાંથી નીકળતાં મિથેન ગેસથી બાયો સીએનજી તૈયાર કરવામાં આવશે. જેથી ૨૬ શહેરોમાં સિટી બસ ચાલશે. આ કામથી પચાસ લાખ યુવાનોને રોજગાર મળશે.

ગડકરીએ આગળ જણાવ્યું કે આપણા દેશમાં કોલસાની કોઈ જ ઉણપ નથી. જેથી મિથેન નીકાળીને મુંબઈ, પુણે તેમજ ગુવાહાટીમાં સિટી બસ ચલાવવાની તૈયારી શરુ કરવામાં આવી છે. ૬૨ રુપિયા પ્રતિ લિટર ડીઝલની કિંમતની સરખામણીમાં મિથેનની કિંમત ૧૬ રૂપિયા પડે છે. તેમણે એ પણ જણાવ્યું કે દેશમાં વૈકલ્પિક ઈંધણને લઈને અનેક પ્રયોગ કરવામાં આવે છે.(૨૧.૯)