Gujarati News

મુંબઈ, તા.૨૯ : શિલ્પા શેટ્ટીના માતા સુનંદા શેટ્ટીએ મુંબઈ પોલીસમાં છેતરપિંડીની એક ફરિયાદ નોંધાવી છે. પોતાની ફરિયાદમાં સુનંદાએ કહ્યું કે તેમની સાથે લેન્ડ લીડ એટલે કે જમીનના ખરીદ-વેચાણમાં ૧.૬ કરોડ રુપિયાની છેતરપિંડી થઈ છે. તેમણે આ કેસમાં સુધાકર ઘરે નામની એક વ્યક્તિને આરોપી જણાવ્યો છે. પોલીસે સુનંદાની ફરિયાદ સાંભળીને આઈપીસીની કલમો અનુસાર કેસ દાખલ કર્યો છે.

ન્યુઝ એજન્સીના રિપોર્ટ અનુસાર, સુનંદા શેટ્ટીએ પોતાની ફરિયાદમાં કહ્યું છે કે આરોપી સુધાકરે નકલી પેપરની મદદથી તેમને ૧.૬ કરોડ રુપિયામાં એક જમીન વેચી. જો કે હજી આ કેસમાં વધારે જાણકારી સામે નથી આવી. પરંતુ લાગી રહ્યું છે કે શિલ્પા શેટ્ટીના પરિવારમાં અત્યારે ચારે તરફથી મુશ્કેલીઓ આવી રહી છે. આ પહેલા બુધવારના રોજ શેર બજારની રેગ્યુલેટરી સેબીએ શિલ્પા અને રાજ પર ૩ લાખ રુપિયાનો દંડ ફટકાર્યો છે.

સેબીએ રાજ કુન્દ્રા અને શિલ્પાની કંપની વિઆન ઈન્ડસ્ટ્રીઝ લિમિટેડને ઈનસાઈડ ટ્રેડિંગના માર્કેટમાં નિયમો તોડવાના આરોપમાં દોષી સાબિત કર્યા છે. તેમની કંપની પર ૩ લાખ રુપિયાનો દંડ ફટકારવામાં આવ્યો છે. અશ્લીલ વીડિયોના રેકેટના કેસમાં પણ ક્રાઈમ બ્રાન્ચની રડાર પર વિઆન ઈન્ડસ્ટ્રીઝ છે. પોલીસનું કહેવુ છે કે રાજ કુન્દ્રા પોતાની કંપનીના આધારે અશ્લીલ વીડિયોનો વેપાર કરતો હતો. પોલીસે રાજ કુન્દ્રાની ઓફિસ પર દરોડા પણ પાડ્યા હતા.

રાજ કુન્દ્રાની ધરપકડ પછી હવે ક્રાઈમ બ્રાન્ચ શિલ્પા શેટ્ટીની પણ પૂછપરછ કરી રહી છે.

પોલીસે ૨૩ જુલાઈના રોજ તેમના ઘરે દરોડા પાડ્યા હતા અને શિલ્પા શેટ્ટીનું નિવેદન નોંધ્યુ હતું. શિલ્પાએ કહ્યુ હતું કે તે રાજ કુન્દ્રાની કંપનીમાં શામેલ નથી. તેણે પતિનો બચાવ કરતા કહ્યું કે, રાજ જે ફિલ્મો બનાવે છે તે ઈરૉટિકા છે, પોર્ન નથી. ક્રાઈમ બ્રાન્ચે હજી શિલ્પા શેટ્ટીને ક્લીન ચિટ નથી આપી.

વિઆન ઈન્ડસ્ટ્રીના બેક્ન અકાઉન્ટની પણ ફોરેન્સિક ઓડિટ ચાલી રહી છે.