Gujarati News

મોસ્કો,તા. ૨૯:  કોરોના વાયરસની બીજી લહેર દેશમાં હોબાળો મચાવી રહી છે.  અન્ય દેશો ભારતની મદદ માટે સતત આગળ આવી રહ્યા છે.  આ બધાની વચ્ચે, રશિયન રાષ્ટ્રપતિ વ્લાદિમીર પુટિને બુધવારે વડા પ્રધાન નરેન્દ્રભાઈ મોદી સાથે ફોન પર વાતચીત પણ કરી હતી.  બંને વચ્ચે કોરોના વાયરસ સંકટ પર ચર્ચા થઈ હતી. 

આ ચર્ચા પછી, રશિયન રાષ્ટ્રપતિએ ટ્વિટ કર્યું છે કે દ્યણા પ્રકારના તબીબી સાધનો ભારત મોકલવામાં આવી રહ્યા છે, જે આજે જ રવાના કરવામાં આવશે.  આમાં ઓકિસજન, વેન્ટિલેટર અને અન્ય ઘણા ઉપકરણો બનાવતા એકમો શામેલ છે.

રશિયાના રાષ્ટ્રપતિ દ્વારા જારી કરવામાં આવેલા નિવેદનમાં જણાવાયું છે કે કોરોના વાયરસ સંકટના આ સમયમાં પુટિને નરેન્દ્ર મોદીને સમર્થન આપ્યું છે અને માનવતાના આધારે ભારત મોકલવામાં આવતી કટોકટીની મદદની જાણકારી આપી છે.  નિવેદનમાં કહેવામાં આવ્યું છે કે, 'રશિયન ઇમરજન્સી મંત્રાલયની ફ્લાઇટ્સ દ્વારા ૨૨ ટન આવશ્યક સાધનો મોકલવામાં આવી રહ્યા છે, જેમાં ૨૦ ઓકિસજન ઉત્પાદન એકમો, ૭૫ વેન્ટિલેટર, ૧૫૦ મેડિકલ મોનિટર અને ૨ લાખ ડ્રગ પેકેટનો સમાવેશ થાય છે. ભારતના વડાપ્રધાને પણ પૂરી પાડવામાં આવેલ સહાય બદલ રશિયાના રાષ્ટ્રપતિનો હાર્દિક આભાર માન્યો હતો.

બંને નેતાઓએ ભારતમાં રશિયન સ્પુટનિક-૫ રસી નોંધણીનું સ્વાગત કર્યું હતું અને તેના અસરકારકતા અને સલામતીનો ઉલ્લેખ કર્યો હતો.  તેમણે એ હકીકતથી સંતોષ પણ વ્યકત કર્યો કે રશિયન ડાયરેકટ ઇન્વેસ્ટમેન્ટ ફંડ દ્વારા ભારતીય કંપનીઓ સાથે સ્પુટનિકના  ડોઝના ઉત્પાદન માટે કરાર કરવામાં આવ્યો છે.  તેનું ઉત્પાદન મે મહિનામાં શરૂ થવાનું છે.