Gujarati News

Gujarati News

News of Saturday, 29th January 2022

જમ્મુ કાશ્મીરનાં બિજબેહરામાં આતંકીઓનો પોલીસ પર હુમલો: એક હેડ કોન્સ્ટેબલનું મોત

સમગ્ર વિસ્તારને કોર્ડન કરી લેવાયો :હુમલાખોરોની શોધ શરૂ

જમ્મુ-કાશ્મીરના દક્ષિણ કાશ્મીરના અનંતનાગ જિલ્લા બિજબેહરા વિસ્તારના હસન પોરા વિસ્તારમાં આતંકવાદીઓએ એક પોલીસકર્મીની ગોળી મારીને હત્યા કરી દીધી હતી. ગંભીર રીતે ઘવાયેલા પોલીસકર્મીને તાત્કાલિક હોસ્પિટલમાં ખસેડવામાં આવ્યો હતો, જ્યાં તેનું સારવાર દરમિયાન મોત નીપજ્યું હતું. પોલીસકર્મીની ઓળખ હેડ કોન્સ્ટેબલ અલી મુહમ્મદ તરીકે થઈ છે. પોલીસ અધિકારીએ કહ્યું કે વિસ્તારને કોર્ડન કરી લેવામાં આવ્યો છે અને હુમલાખોરોની શોધ શરૂ કરવામાં આવી છે.

પોલીસ અધિકારીએ કહ્યું કે વિસ્તારને કોર્ડન કરી લેવામાં આવ્યો છે અને હુમલાખોરોની શોધ શરૂ કરવામાં આવી છે. બીજી તરફ, શનિવારે જ જમ્મુ-કાશ્મીરની રાજધાની શ્રીનગરના મહારાજ બજાર વિસ્તારમાં આતંકવાદીઓએ સુરક્ષા દળો પર ગ્રેનેડ ફેંક્યો હતો, પરંતુ હજુ સુધી કોઈને ઈજા થઈ નથી.

 

એક પોલીસ અધિકારીએ જણાવ્યું કે, આતંકવાદીઓએ શ્રીનગરના મહારાજ બજાર ચોક વિસ્તારમાં સાંજે 5.30 વાગ્યે સેન્ટ્રલ રિઝર્વ પોલીસ ફોર્સ અને પોલીસકર્મીઓની ટીમ પર ગ્રેનેડ ફેંક્યો હતો. તેમણે કહ્યું કે વિસ્ફોટમાં કોઈ જાનહાનિના અહેવાલ નથી. અધિકારીએ કહ્યું કે વિસ્તારને કોર્ડન કરી લેવામાં આવ્યો છે અને હુમલાખોરોની શોધ ચાલી રહી છે. અગાઉ ગયા વર્ષે ડિસેમ્બરમાં જમ્મુ-કાશ્મીરના બાંદીપોરામાં ગુલશન ચોક ખાતે આતંકવાદીઓએ પોલીસ પાર્ટી પર હુમલો કર્યો હતો. આ હુમલામાં બે પોલીસ જવાનો શહીદ થયા હતા.

ઘાટીમાં આતંકવાદીઓનું આ નાપાક ષડયંત્ર સતત વધી રહ્યું છે. તે જ મહિનામાં, 16 જાન્યુઆરીએ, આતંકવાદીઓએ જૂના શ્રીનગર શહેરમાં સુરક્ષા દળો પર ગ્રેનેડથી હુમલો કર્યો હતો. આ હુમલામાં એક પોલીસકર્મી અને એક નાગરિક ઘાયલ થયા છે. અધિકારીઓએ જણાવ્યું કે આતંકવાદીઓએ સરાફ કદલ વિસ્તારમાં તૈનાત પોલીસ અને સેન્ટ્રલ રિઝર્વ પોલીસ ફોર્સના જવાનો પર ગ્રેનેડ ફેંક્યો હતો. આતંકવાદીઓના ગ્રાઉન્ડ નેટવર્કને નષ્ટ કરવા માટે ઘણી એજન્સીઓ સાથે મળીને કામ કરી રહી છે. 

(7:12 pm IST)