Gujarati News

ઈસ્લામાબાદ: પાકિસ્તાનના અશાંત બલૂચિસ્તાન પ્રાંતમાં શુક્રવારે રસ્તાની બાજુમાં થયેલા વિસ્ફોટમાં ઓછામાં ઓછા ચાર લોકો માર્યા ગયા અને ૧૦ અન્ય ઘાયલ થયાનું અધિકારીઓએ જણાવ્યું હતું.

 આ વિસ્ફોટ ત્યારે થયો જ્યારે લોકો એક વાહનમાં ડેરા બુગતી જિલ્લાના માટ વિસ્તારમાંથી પસાર થઈ રહ્યા હતા. 
 આ વિસ્તારના સેનેટર સરફરાઝ બુગતીએ હુમલાની પુષ્ટિ કરી અને કહ્યું કે વિસ્ફોટમાં માર્યા ગયેલા લોકોમાં તેમના એક સંબંધીનો પણ સમાવેશ થાય છે.
તેમણે કહ્યું કે પ્રતિબંધિત બલૂચ રિપબ્લિકન આર્મી (BLA) બ્લાસ્ટ માટે જવાબદાર છે.
ટ્વિટર પર પોસ્ટ કરાયેલા એક સંક્ષિપ્ત નિવેદનમાં બુગતીએ કહ્યું, "પાકિસ્તાનની પ્રાંતીય અને સંઘીય સરકારો નિર્દોષ લોકોની સુરક્ષા કરવામાં નિષ્ફળ રહી છે.  આવી પરિસ્થિતિઓ લોકોને પોતાની જાતે પગલાં લેવા માટે પ્રેરિત કરશે."
બલૂચિસ્તાનના મુખ્ય પ્રધાન મીર અબ્દુલ કુદ્દુસ બિઝેન્જોએ કહ્યું કે દુશ્મનોએ પ્રાંતની શાંતિને નષ્ટ કરવા માટે ફરી એકવાર આતંકવાદનું કાયરતાપૂર્ણ કૃત્ય કર્યું છે.
 "આતંકવાદીઓને ન્યાય અપાવવામાં કોઈ કસર બાકી રાખવામાં આવશે નહીં," તેમણે કહ્યું
થોડા દિવસો પહેલા પ્રાંતના કેચ વિસ્તારમાં એક સુરક્ષા ચોકી પર હુમલો કરવામાં આવ્યો હતો જેમાં ૧૦ જવાનો માર્યા ગયા હતા.