Gujarati News

વોશિંગ્ટન તા. ૨૮ : અમેરિકાના રાષ્ટ્રપતિ ડોનાલ્ડ ટ્રમ્પે અમેરિકાની પ્રથમ મહિલા મેલાનિયા ટ્રમ્પની અવગણના કરવા માટે મીડિયાની ભારે ટીકા કરી હતી. તેણે કહ્યું કે મેલાનીયા ટ્રમ્પ અમેરિકાના ઇતિહાસમાં સૌથી સુંદર મહિલા હતી, તેમ છતાં છેલ્લા ચાર વર્ષોમાં તેણીને કોઈ જ મેગેઝિન દ્વારા કોઈ પણ કવર પેજ પર દર્શાવવામાં આવી નથી. બરાક ઓબામાના રાષ્ટ્રપતિ કાર્યકાળ દરમિયાન, તેમની પત્ની મિશેલ ઓબામા આઠ વર્ષમાં ઘણી વાર ૧૨ મોટા સામયિકો દ્વારા તેમના કવર પેજ પર પ્રકાશિત કરવામાં આવી હતી.

ટ્રમ્પે સોશિયલ મીડિયાના માધ્યમથી કહ્યું હતું કે અમેરિકન મીડિયાનું આ ભેદભાવપૂર્ણ વલણ છે. મારા કાર્યકાળ દરમિયાન, કોઈ પણ સામયિકોએ મારી પત્ની મેલાનિયાને કવર પેજ પર સ્થાન નથી આપ્યું. અને કોઈ પણ પ્રકારની તક આપી ન હતી. પરંતુ જયારે તેમનો કાર્યકાળ પૂરો થઈ રહ્યો છે, ત્યારે મીડિયા મેલાનીયા ટ્રમ્પને મહાન કહે છે.

બીજી તરફ, કેટલાક સામયિકોમાં ટ્રમ્પના આક્ષેપો વિશે કહેવામાં આવ્યું હતું કે તેમના આક્ષેપો પાયાવિહોણા છે; જો કે, ટ્રમ્પના સમર્થકો પણ માને છે કે મેલાનીયાના ફોટા મેગેઝિન દ્વારા જાણી જોઈને પ્રકાશિત કરવામાં આવ્યા નથી. મોટાભાગના સમર્થનમાં લખ્યું છે કે મેલાનિયા ખરેખર સુંદર છે. પરંતુ મીડિયા તેમને જાણી જોઈને જગ્યા આપતું નથી. સમર્થકો પણ આક્ષેપ કરે છે કે મીડિયા ડોનાલ્ડ ટ્રમ્પ વિશે નકલી સમાચાર ફેલાવવામાં નિષ્ણાંત છે. આવા માધ્યમોનો બહિષ્કાર કરવો જોઇએ.

રિપોર્ટ અનુસાર મેલાનિયા ડોનાલ્ડ ટ્રમ્પ સાથેના લગ્ન પહેલા એક મોડેલ રહી ચૂકી હતી. ટ્રમ્પ સાથે લગ્ન કર્યા પછી, મેલાનિયાને ક્રિશ્યિયન લગ્ન પહેરવેશમાં વોગના કવર પેજ પર દર્શાવવામાં આવી હતી. તે જ સમયે, ૫૬ વર્ષીય મિશેલ ઓબામા આઠ વર્ષમાં ૧૨ સામયિકોના કવર પર દેખાઇ છે, જયારે ૫૦ વર્ષીય મેલાનિયા તેના પતિના ચાર વર્ષના કાર્યકાળ દરમિયાન કોઈ મેગેઝિનના કવર પર દેખાઈ ન હતી.

બીજી તરફ, સીએનએન દ્વારા તાજેતરમાં જારી કરાયેલા એક અહેવાલમાં દાવો કરવામાં આવ્યો છે કે મેલાનીયા ટ્રમ્પે વ્હાઇટ હાઉસ છોડવાની યોજના પર કામ કરવાનું શરૂ કર્યું છે. આ માટે તેઓએ બજેટ અને સ્ટાફનું કામ પણ શરૂ કરી દીધું છે. તે જલ્દીથી ફલોરિડામાં પોતાનું કાર્યાલય ખોલશે.

નોંધપાત્ર વાત એ છે કે અમેરિકાની પૂર્વ પ્રથમ મહિલા હોવાથી તેમને દર મહિને ૨૦ હજાર ડોલર પેન્શન પણ આપવામાં આવશે. અહેવાલમાં જણાવાયું છે કે મેલાનીયા ટ્રમ્પ અમેરિકાની ફર્સ્ટ લેડી અને વ્હાઇટ હાઉસમાં વિતાવેલા ચાર વર્ષ અંગે એક પુસ્તક લખવાના વિચારમાં છે. આ પુસ્તકમાં તેની ચાર વર્ષની યાદો હશે. અગાઉ, મિશેલ ઓબામા અને જયોર્જ બુશની પત્ની લૌરા બુશે પણ આ પુસ્તક લખ્યું છે.