Gujarati News

Gujarati News

News of Monday, 28th May 2018

આગામી મહિનાઓમાં ત્રણ ડઝન કંપનીઓના 35,000 કરોડના આઇપીઓ આવવાનો અંદાજ

બિઝનેસના વિસ્તરણ અને કાર્યકારી મૂડી માટે મૂડીબજારમાંથી ભંડોળ એકત્ર કરાશે

નવી દિલ્હી:આગામી મહિનાઓમાં ત્રણ ડઝન કંપનીઓના 35,000 કરોડના આઇપીઓ આવવાની ધારણા છે આ કંપનીઓ બિઝનેસના વિસ્તરણ અને કાર્યકારી મૂડીની જરૂરિયાત પૂરી કરવા માટે મૂડીબજારમાંથી ભંડોળ એકત્ર કરશે

   આઇપીઓની યોજના ધરાવતી કંપનીઓમાં છ કંપની જાહેર સાહસ છે. આ કંપનીઓમાં ઇન્ડિયન રિન્યુએબલ ડેવલપમેન્ટ એજન્સી, રેલ વિકાસ નિગમ, IRCON ઇન્ટરનેશનલ, RITES, ગાર્ડન રિચ શિપબિલ્ડર્સ અને મઝગાંવ ડોકનો સમાવેશ થાય છે.

   આ વર્ષે બાર્બેક્યુ નેશન હોસ્પિટાલિટી, TCNS ક્લોથિંગ કંપની, નઝારા ટેક્‌નોલોજી અને દેવી સીફૂડ સહિતની 12 કંપનીઓએ આઇપીઓ માટે સેબીની મંજૂરી મેળવી છે. આ ઉપરાંત 24 કંપની સેબીની મંજૂરીની રાહ જોઈ રહી છે. આ કંપનીઓમાં રૂટ મોબાઇલ, ક્રેડિટએક્સેસ ગ્રામીણ, સેમ્બકોર્પ એનર્જી ઇન્ડિયા, ફ્લેમિન્ગો ટ્રાવેલ રિટેલ અને લોઢા ડેવલપર્સ સહિતનો સમાવેશ થાય છે.

મર્ચન્ટ બેન્કિંગનાં સૂત્રોના જણાવ્યા અનુસાર આ કંપનીઓ આઇપીઓ મારફત કુલ 35,000 કરોડ એકત્ર કરે તેવી ધારણા છે. ચાલુ વર્ષે અત્યાર સુધી 15 કંપનીએ આઇપીઓ મારફત નાણાં એકત્ર કર્યાં છે. આ કંપનીઓમાં આઇસીઆઇસીઆઇ સિક્યોરિટીઝ, બંધન બેન્ક, હિન્દુસ્તાન એરોનોટિક્સ અને મિશ્ર ધાતુ સહિતનો સમાવેશ થાય છે.

   નિષ્ણાતોના જણાવ્યા અનુસાર આશરે 12 કંપની સેબીની મંજૂરીની રાહ જોઈ રહી હોવાથી આઇપીઓ માર્કેટને વેગ મળવાની ધારણા છે. 2017માં 36 કંપનીએ આઇપીઓ મારફત 67,000 કરોડ એકત્ર કર્યા હતા.

(12:39 pm IST)