Gujarati News

નવી દિલ્હીઃ ૧૯૬૪ ટોક્યો ઓલિમ્પિકમાં ભારતીય હોકી ટીમ માટે ગોલ્ડ મેડલ જીતનાર કેપ્ટન ચરણજીત સિંહનું નિધન થયું છે.  તેઓ ૯૧ વર્ષના હતા. વડાપ્રધાન નરેન્દ્રભાઇ મોદીએ આ પદ્મશ્રી પુરસ્કાર વિજેતાના નિધન પર શોક વ્યકત કરતાં કહ્યું કે ભારતીય હોકીની સફળતામાં ચરણજીત સિંહની મુખ્ય ભૂમિકા છે.  ચરણજીત સિંહનું હિમાચલ પ્રદેશના ઉનામાં તેમના ઘરે હૃદયરોગના હુમલાથી નિધન થયું હતું.  તેઓ લાંબા સમયથી વય સંબંધિત બિમારીઓથી પીડિત હતા.

  વડાપ્રધાન નરેન્દ્રભાઇ મોદીએ ટ્વીટ કરીને કહ્યું, જાણીતા હોકી ખેલાડી ચરણજીત સિંહના નિધનથી દુઃખી છું.  તેમણે ભારતીય હોકી ટીમની સફળતામાં મુખ્ય ભૂમિકા ભજવી હતી, ખાસ કરીને ૧૯૬૦ના દાયકામાં રોમ અને ટોક્યો ઓલિમ્પિકમાં.  હું તેમના પરિવાર અને મિત્રો પ્રત્યે મારી સંવેદના વ્યકત કરું છું. ચરણજીતના પરિવારમાં ૨ પુત્ર અને એક પુત્રી છે.  ચરણજીતને પાંચ વર્ષ પહેલા સ્ટ્રોક આવ્યો હતો અને ત્યારથી તે લકવાગ્રસ્ત હતો.  તેમના પુત્ર વીપી સિંહે કહ્યું, તે લાકડીના સહારે ચાલતો હતો, પરંતુ છેલ્લા બે મહિનાથી તેની હાલત વધુ ખરાબ થઈ ગઈ હતી. ચરણજીતની પત્નીનું ૧૨ વર્ષ પહેલા અવસાન થયું હતું.  તેનો મોટો દીકરો કેનેડામાં ડોકટર છે અને નાનો દીકરો તેની સાથે રહેતો હતો.

 ચરણજીતસિંહ ભારતની ૧૯૬૪ ટોક્યો ઓલિમ્પિકમાં ગોલ્ડ મેડલ જીતનારી હોકી ટીમના કેપ્ટન હતા.  તે ૧૯૬૦ રોમ ઓલિમ્પિકની સિલ્વર મેડલ વિજેતા ટીમમાં પણ હતો. આ સિવાય તે ૧૯૬૨ની એશિયન ગેમ્સમાં સિલ્વર મેડલ વિજેતા ટીમનો પણ સભ્ય હતા બે વખતના ઓલિમ્પિયન ચરણજીતની કપ્તાની હેઠળ ભારતે ૧૯૬૪ ઓલિમ્પિકની ફાઇનલમાં પાકિસ્તાનને હરાવીને ટાઇટલ જીત્યું હતું.  આંતરરાષ્ટ્રીય હોકીમાં તેમની શાનદાર કારકિર્દીને અલવિદા કર્યા પછી, તેઓ હિમાચલ પ્રદેશ યુનિવર્સિટી, શિમલામાં શારીરિક શિક્ષણ વિભાગના ડિરેકટર પણ હતા.