Gujarati News

Gujarati News

News of Friday, 27th September 2019

વડાપ્રધાન મોદી પછી દેશમાં સૌથી વધુ પ્રશંસનીય વ્યકિત છે ધોનીઃ સર્વે

સર્વેમાં એમ.એસ.ધોની બીજા નંબરે છે, મહિલાઓમાં આ સ્થાન એમ.સી.મેરિકોમને મળ્યુ છે

નવી દિલ્હી, તા.૨૭: ભારતીય ક્રિકેટ ટીમના પૂર્વ કેપ્ટન મહેન્દ્ર સિંહ ધોની આઈસીસી વર્લ્ડ કપ પછી હાલ ક્રિકેટમાં જોવા નથી મળી રહ્યા. તેમ છતાં લોકપ્રિયતાની બાબતે તે બધા જ ખેલાડીઓમાં સૌથી આગળ છે. એક સર્વે અનુસાર ભારતમાં વડાપ્રધાન નરેન્દ્રભાઇ મોદી જ એક એવી વ્યકિત છે જે દેશમાં ધોની કરતાં વધુ પ્રશંસનીય છે. યુગોવના આ સર્વેમાં એમ.એસ. ધોની બીજા નંબરે છે. મહિલાઓમાં આ સ્થાન એમ.સી. મેરિકોમને મળ્યું છે.

આ સર્વે યુગોવ  દ્વારા કરાવાયો છે, જેમાં ૪૧ દેશના ૪૨,૦૦૦ લોકોએ ભાગ લીધો હતો. આ સર્વેમાં બે કેટેગરી (પુરુષ અને મહિલા)માં દુનિયાના સૌથી વધુ પ્રશંસનીય લોકોની યાદી તૈયાર કરવામાં આવી છે. આ સર્વે અનુસાર સૌથી વધુ પ્રશંસનીય લોકોની યાદીમાં ભારતના વડાપ્રધાન નરેન્દ્રભાઇ મોદી છઠ્ઠા સ્થાને છે. બિલ ગેટ્સ આ યાદીમાં પ્રથમ નંબરે છે. તેમના પછી બરાક ઓબામા, જેકી ચેન, શી જિનપિંગ અને જેક મા છે.

સૌથી વધુ પ્રશંસનીય લોકોની યાદીમાં માત્ર ભારતીય લોકોની વાત કરીએ તો વડાપ્રધાન મોદી પ્રથમ સ્થાને છે. ત્યાર પછી એમ.એસ. ધોનીનું નામ છે. એટલે કે, ધોની ટીમ ઈન્ડિયાના વર્તમાન કેપ્ટન વિરાટ કોહલીથી પણ આગળ છે. ભારતીયોમાં મોદી અને ધોની પછી રતન ટાટા ત્રીજા સ્થાને, અમિતાભ બચ્ચન ચોથા, સચિન તેંડુલકર ૫માં અને વિરાટ કોહલી છઠ્ઠા નંબરે છે.

આ સર્વે અનુસાર ભારતની સૌથી વધુ પ્રશંસનીય મહિલામાં બોકસ એમ.સી. મેરીકોમનું નામ ટોચ પર છે. દુનિયાભરની પ્રશંસનીય મહિલાઓની યાદીમાં મેરીકોમ ૨૫મા સ્થાને છે. ભારતીય મહિલાઓમાં મેરીકોમ પછી કિરણ બેદી, લતા મંગેશકર, સુષમા સ્વરાજ, દીપિકા પાદુકોણનો નંબર છે. વિશ્વની ટોપ-૨૫ પ્રશંસનીય મહિલાઓની યાદીમાં મેરીકોમ એકમાત્ર ભારતીય છે.

આ સર્વે અુસાર પીએમ મોદીને (૧૫.૬૬ ટકા) એડમાયરેશન રેટિંગ પોઈન્ટ મળ્યા છે. એમ.એસ. ધોની ૮.૫૮ ટકા સાથે બીજા નંબરે છે. રતન ટાટા(૮.૦૨%) ત્રીજા અને અમિતાભ બચ્ચન (૬.૫૫%) ચોથા સ્થાને છે. ત્યાર પછી સચિન તેંડુલકર (૫.૮૧%) અને વિરાટ કોહલી (૪.૪૬%)નો ક્રમ આવે છે.(

(11:41 am IST)