Gujarati News

નવી દિલ્હી, તા.૨૭: ગત વર્ષે એલપીજીના ભાવમાં આશરે ૨૦ ટકાનો વધારો થયો છે, જયારે ક્રૂડ ઓઇલના ભાવમાં આશરે ૪૦ ટકાનો ઘટાડો થયો છે. કેટલાક ગ્રાહકોને હજી નજીવી સબસિડી મળી રહી છે, જયારે કેટલાક માટે સબસિડી હવે શૂન્ય થઈ ગઈ છે, કારણ કે સ્થાનિક પરિવહન પછી અંતિમ ભાવ નક્કી કરવામાં આવે છે. સબસિડીવાળા સિલિન્ડરોના વધતા ભાવ અને વૈશ્વિક ભાવોના ઘટાડાને કારણે દર મહિને સબસિડીનો નાશ કરવામાં આવે છે. પાછલા માર્ચમાં કેરોસીન પરની સબસિડી સમાપ્ત થઈ ગઈ હતી અને હવે એલપીજી ગેસ પર સબસિડી પૂરી થતાં સરકારને ઘણી રાહત મળી છે, કારણ કે સરકારને નાણાં જમા કરવામાં મુશ્કેલી પડી રહી છે.

ગયા વર્ષે જૂનમાં દિલ્હીમાં સબસિડીવાળા ૧૪ કિલો એલપીજી સિલિન્ડરની કિંમત ૪૯૭ રૂપિયા હતી, જે હવે વધીને ૫૯૩ થઈ ગઈ છે. દિલ્હીવાસીઓ માટે, એલપીજી ગેસ પર સબસિડી ૨૪૦ રૂપિયાથી દ્યટીને શૂન્ય પર આવી ગઈ છે. પેટ્રોલિયમ મંત્રાલયના એક ટ્વિટર હેન્ડલ પર જાહેર કર્યું છે કે, મે અને જૂન પછી કોઈ સબસિડી નહીં મળે.

આ ટ્વિટર હેન્ડલ પર ગ્રાહકની ફરિયાદના જવાબમાં એવું કહેવામાં આવ્યું હતું કે ૧ મે, ૨૦૨૦ થી એલપીજી ગેસના ભાવ નોંધપાત્ર રીતે નીચે આવી ગયા છે અને સબસિડીવાળા ગેસના ભાવની નજીક પહોંચી ગયા છે. મે ૨૦૨૦ માં સબસિડી કોઈપણ ગ્રાહકને ટ્રાન્સફર કરવાની રહેશે નહીં. જયારે ભવિષ્યમાં કિંમતોમાં કેટલાક વધઘટ થશે ત્યારે કિંમતો આપમેળે ગોઠવાઈ જશે.

આ અંગે અધિકારીએ જણાવ્યું હતું કે, સબસિડી તમામ ગ્રાહકો માટે શૂન્ય રહી નથી અને કેટલાક ગ્રાહકોને ૧૦-૧૨ રૂપિયાની સબસિડી પણ ચુકવવામાં આવી છે. એક વર્ષ દરમિયાન, એલપીજીનો બજાર ભાવ રૂ .૭૩૭.૫ થી દ્યટીને ૫૯૩ થયો છે. દરમિયાન સબસિડીવાળા સિલિન્ડરની કિંમત ૯૬ રૂપિયા વધીને ૫૯૩ રૂપિયા પર પહોંચી ગઈ છે. ઉજ્જવલા યોજના હેઠળ ગેસ સિલિન્ડર લેનારાઓ માટે, ભાવમાં રૂ .૮ નો વધારો થયો છે, જયારે અન્ય લોકો માટે તે વધારીને ૨૯ રૂપિયા કરવામાં આવ્યો છે.

કુલ ૨૮ કરોડ એલપીજી ગ્રાહકોમાંથી ૧.૫ કરોડ ગ્રાહકો સબસિડી લેતા નથી અને બાકીના ૮ કરોડ ઉજવલા યોજના હેઠળ સિલિન્ડરનો ઉપયોગ કરી રહ્યા છે. ૨૦૧૯-૨૦માં એલપીજી સબસિડી રૂ .૨૨,૬૩૫ કરોડ હતી, જે ગયા વર્ષે રૂ.૩૧,૪૪૭ કરોડ કરતા નોંધપાત્ર ઓછી છે.