Gujarati News

જયપુર, તા.૨૭: દેશમાં કુતુબમિનાર સંકુલ બાદ મુઘલ યુગની અનેક મસ્‍જિદોના સર્વેની માંગ હિન્‍દુ સંગઠનો દ્વારા કરવામાં આવી રહી છે. તાજેતરની માંગ અજમેરમાં સૂફી સંત મોઇનુદ્દીન ચિશ્‍તીની દરગાહને લગતી છે જયાં એક હિન્‍દુ સંગઠને દાવો કર્યો છે કે તે પહેલા એક મંદિર હતું જેને પાછળથી તોડીને મસ્‍જિદમાં પરિવર્તિત કરવામાં આવ્‍યું હતું અને ભારતીય પુરાતત્‍વ સર્વેક્ષણ દ્વારા સર્વેની માંગણી કરી હતી.

મહારાણા પ્રતાપ સેનાના રાજવર્ધન સિંહ પરમારે દાવો કર્યો હતો કે દરગાહની દિવાલો અને બારીઓમાં હિંદુ ધર્મ સાથે સંબંધિત પ્રતીકો છે. પરમારે જણાવ્‍યું હતું કે ‘તેમની માંગ એ છે કે દરગાહનો ASI દ્વારા સર્વે કરવામાં આવે.'

દરગાહની ખાદીમેન કમિટીએ આ દાવાને ફગાવી દીધો અને કહ્યું કે ત્‍યાં આવી કોઈ નિશાની નથી. તેમણે કહ્યું કે દરગાહમાં હિન્‍દુ અને મુસ્‍લિમ બંને સમુદાયના કરોડો લોકો આવે છે. તેમણે કહ્યું કે, ‘હું પૂરી જવાબદારી સાથે કહું છું કે દરગાહમાં ક્‍યાંય પણ સ્‍વસ્‍તિક પ્રતીક નથી. દરગાહ ત્‍યાં ૮૫૦ વર્ષથી છે. એવો કોઈ પ્રશ્ન આજદિન સુધી ઊભો થયો નથી. દેશમાં આજે એક ખાસ પ્રકારનું વાતાવરણ છે જે પહેલા ક્‍યારેય નહોતું.'

આ દાવા પર વધુ સવાલ ઉઠાવતા કહ્યું કે ખ્‍વાજા મોઇનુદ્દીન ચિશ્‍તીની દરગાહ પર સવાલ ઉઠાવવાનો અર્થ એ છે કે જેઓ પોતપોતાના ધર્મનું પાલન કરે છે અને અહીં આવે છે તેમના કરોડો લોકોની ભાવનાઓને ઠેસ પહોંચાડવી છે. ચિશ્‍તીએ કહ્યું કે આવા તમામ તત્‍વોને જવાબ આપવાનું કામ સરકારનું છે. સમિતિના સચિવ વાહિદ હુસૈન ચિશ્‍તીએ કહ્યું કે આ કોમી સૌહાર્દને ખલેલ પહોંચાડવાનો પ્રયાસ છે.

તમને જણાવી દઈએ કે, પરમાર વતી આ પત્ર રાજસ્‍થાનના મુખ્‍યમંત્રી અશોક ગેહલોતને મોકલવામાં આવ્‍યો છે. આ પત્રની નકલ રાષ્ટ્રપતિ, રાજસ્‍થાનના રાજયપાલ, કેન્‍દ્રીય મંત્રી જી કિશન રેડ્ડી અને કેન્‍દ્રીય મંત્રી મીનાક્ષી લેખીને પણ મોકલવામાં આવી છે.

આ પહેલા પણ પરમારે માંગ કરી હતી કે દિલ્‍હીમાં ત્રણ મુઘલ શાસકોના નામના રોડનું નામ હિન્‍દુ શાસકોના નામ પર રાખવામાં આવે. તેમના તરફથી કહેવામાં આવ્‍યું હતું કે સરકારે દિલ્‍હીના અકબર રોડનું નામ બદલીને મહારાણા પ્રતાપ માર્ગ, શાહજહાં રોડનું નામ બદલીને પરશુરામ માર્ગ અને હુમાયુ રોડનું નામ બદલીને અહલ્‍યાબાઈ હોલ્‍કર કરવાની માંગ કરી હતી.