Gujarati News

નવી દિલ્હી, તા.૨૭: આખો દેશ ગુરુવાર ૨૩ મેના રોજ ચૂંટણીના પરિણામની કાગડોળે રાહ જોઈ રહ્યો હતો ત્યારે મધ્ય પ્રદેશમાં એક એવી ઘટના બની જેના વિષે જાણીને બધા જ હેરાન છે. સિરોંજ શહેરના ટોરી બાગરોદમાં એક દુલ્હન લગ્નના ૧૫ દિવસ પછી એ જ પંડિત સાથે ભાગી ગઈ જેણે વિવાહ મંડપમાં તેના ફેરા કરાવ્યા હતા.

સિરોંજના ટોરી બાગરોદમાં રહેતી ૨૧ વર્ષની યુવતી ગામમાં રહેતા પંડિત સાથે ફરાર થઈ ગઈ છે. તે લગ્ન બાદ પિયર રહેવા આવી હતી. મામલો ૨૩ મેનો છે. ૧૫ દિવસ પહેલા એટલે કે ૭ મેના રોજ આ જ પંડિતે દુલ્હનના બીજા યુવક સાથે લગ્ન કરાવ્યા હતા.

લગ્ન પછી દુલ્હન વિદાઈ થઈ ગઈ હતી અને ત્રણ જ દિવસ પછી પિયર પાછી આવી હતી. ૨૩ મેના રોજ ગામના લોકો જયારે બીજા લગ્ન પ્રસંગમાં વ્યસ્ત હતા, યુવતી પંડિત વિનોદ સાથે ભાગી ગઈ હતી. વિનોદ આ લગ્નમાં પણ વિધિ કરાવવાનો હતો પરંતુ લગ્નની વિધિ શરૂ થાય એ પહેલા જ તે ત્યાંથી ગાયબ થઈ ગયા. પંડિત માટે બધાએ શોધખોળ શરૂ કરી તો તે ગુમ હોવાનું માલૂમ પડ્યું. કોઈએ એમ પણ જણાવ્યું કે યુવતી પણ ઘરેથી ગાયબ છે.

શુક્રવારે ૨૪ મેના રોજ બંનેનો કોઈ અતોપતો ન લાગ્યો તો યુવતીના પરિવારજનો અને ગામના સરપંચ રાજેશ શાહૂએ પોલીસ સ્ટેશનમાં ફરિયાદ નોંધાવી અને પોલીસે તપાસ શરૂ કરી. એવું જાણવા મળ્યું કે ફરાર થયેલો વિનોદ પરણિત છે. પરિવારમાં તેની પત્ની ઉપરાંત બે બાળકો પણ છે. ઘટના બની તે દિવસથી આખો પરિવાર ગાયબ છે. ગામવાળાનું કહેવું છે કે વિનોદ અને યુવતી વચ્ચે છેલ્લા બે વર્ષથી પ્રેમ સંબંધ ચાલી રહ્યો હતો.

ગાયબ યુવતીના પરિવારજનોએ વિનોદની પત્ની સામે પણ ફરિયાદ દાખલ કરી છે. યુવતી પોતાની સાથે દોઢ લાખ રૂપિયાના ઘરેણા અને ૩૦ હજાર રૂપિયા રોકડ લઈ ગઈ છે. સિરોંજ પોલીસ સ્ટેશનના અધિકારી શકુંતલા બામનિયાએ જણાવ્યું કે યુવતી વયસ્ક હોવાથી ગુમ થવાની ફરિયાદ નોંધવામાં આવી છે.