Gujarati News

રાયપુર, તા.૨૭ : એક અત્યંત ચોંકાવનારી ઘટનામાં ૩૦ વર્ષની શિક્ષિકાના જાતિય અને માનસિક ત્રાસથી કંટાળીને ૧૭ વર્ષના એક તેજસ્વી વિદ્યાર્થીએ આપઘાત કરી લીધો છે. છોકરાએ મરતા પહેલા પોતાના લેપટોપમાં કોડવર્ડમાં સ્યૂઈસાઈડ નોટ લખી હતી, અને તેને ડીકોડ કરવા તેની પાસકી પોતાના લોહી દ્વારા દીવાલ પર લખી હતી. ૧૧મા ધોરણમાં ભણતો છોકરો ખૂબ જ સારો અકેડમિક રેકોર્ડ ધરાવતો હતો, અને ગયા મહિને જ સાયન્સ ઓલિમ્પિયાડમાં પ્રાઈસ પણ જીત્યો હતો. તેના સાથી વિદ્યાર્થીઓ અને શિક્ષકો માનતા હતા કે તે ટેક્નોલોજી સેક્ટરમાં ખૂબ નામ કમાશે. પોલીસના જણાવ્યા અનુસાર, છોકરાએ ૧૮ માર્ચના રોજ પોતાના ઘરમાં આપઘાત કર્યો હતો. નવાઈની વાત એ છે કે, તેણે પોતાનું જીવન ટૂંકાવ્યું તેની મિનિટો પહેલા જ તેને મહિલા ટીચર મળવા માટે તેના ઘરે આવી હતી. છોકરાના મોબાઈલમાંથી પોલીસને ચેટ પણ મળી આવી છે, જેના પરથી એટલું સ્પષ્ટ થઈ ગયું છે કે શિક્ષિકા તેને હેરાન કરતી હતી, અને તેને આપઘાત કરવા માટે મજબૂર કર્યો હતો.

પોલીસે આ મામલે ૩૦ વર્ષીય શિક્ષિકાની ધરપકડ કરી લીધી છે. તેના પર આપઘાત માટેની દુષ્પ્રેરણા આપવા ઉપરાંત પોક્સો એક્ટ હેઠળ ગુનો નોંધવામાં આવ્યો છે. શિક્ષિકા હાલ સરકારી સ્કૂલમાં શિક્ષાકર્મી તરીકે ફરજ બજાવે છે. અગાઉ તે એક પ્રાઈવેટ સ્કૂલમાં કેમેસ્ટ્રી ભણાવતી હતી, જ્યાં મૃતક છોકરો ગયા વર્ષે ભણતો હતો.

૧૮ માર્ચના રોજ મૃતકની માતા કોઈક કામથી ઘરની બહાર જઈ રહી હતી ત્યારે જ મૃતકનો એક મિત્ર એક યુવતી સાથે ઘરે આવ્યો હતો. યુવતીએ પોતાના ચહેરા પર દુપટ્ટો બાંધી રાખ્યો હતો, અને તેને લાવનારા છોકરાએ પોતાની બહેન તરીકે તેની ઓળખાણ આપી હતી. મૃતકની માતાને કોઈ શંકા ના જતાં તેઓ ઘરની બહાર નીકળી ગયા હતા, અને યુવતી તેમજ તેની સાથે આવેલો છોકરો મૃતકના રુમમાં ગયા હતા. પોલીસના જણાવ્યા અનુસાર, ૧૮ માર્ચે મૃતકના ઘરે આવેલી યુવતી તે જ શિક્ષિકા હતી કે જેની સાથે મૃતક રિલેશનમાં હતો. તે દિવસે છોકરાની માતા ઘરે આવી ત્યારે તેના રુમનો દરવાજો બંધ હતો. તેમણે દરવાજો ખટખટાવ્યો, પરંતુ અંદરથી કોઈ અવાજ ના આવતા તેઓ ડરી ગયા હતા, આખરે દરવાજાને ધક્કો મારતા જ તે ખૂલી ગયો હતો અને અંદર તેમના દીકરાની લાશ પડી હતી.

પ્રાથમિક તપાસમાં બહાર આવેલી વિગતો અનુસાર, છોકરો તેને કેમેસ્ટ્રી ભણાવતી શિક્ષિકા સાથે રિલેશનમાં હતો, જે આગળ જતાં જાતિય અને માનસિક ત્રાસમાં ફેરવાઈ ગયા હતા. શિક્ષિકાનું બીજા કોઈ સાથે અફેર ચાલે છે તેવી જાણ થતાં છોકરો ભાંગી પડ્યો હતો. પોલીસનું કહેવું છે કે, શિક્ષિકા પોતાના એક કલીગને પરણવાની તૈયારીમાં હતી. મૃતક અને શિક્ષિકા વચ્ચે થયેલી ચેટ અનુસાર, પ્રેમમાં દગો મળ્યાનો અહેસાસ થયા બાદ મૃતક શિક્ષિકા પાસેથી પ્રેમ ઝંખી રહ્યો હતો, પરંતુ તે તેને જવાબ નહોતી આપી રહી.

બીજી તરફ, પોલીસને પોતાનું નિવેદન આપતા શિક્ષિકાએ જણાવ્યું હતું કે, ખરેખર તો મૃતક વિદ્યાર્થી તેનો પીછો કરતો હતો. જોકે, તેણે આ અંગે ના તો પોલીસ ફરિયાદ કરી હતી કે ના તો પોતાના ફિયાન્સ કે બીજા કોઈ પરિચિતને આ અંગે વાત કરી હતી. ૧૮ માર્ચે તે મૃતકના ઘરે કેમ ગઈ હતી તે સવાલના જવાબમાં શિક્ષિકાએ જણાવ્યું હતું કે, તેનો ફોન હેક થઈ ગયો હતો અને મૃતક મોબાઈલનો એક્સપર્ટ હોવાથી તે તેની પાસે ગઈ હતી.

હાલ પોલીસ છોકરાના સ્કૂલના મિત્રો અને શિક્ષકોના નિવેદન લઈ રહી છે. જોકે, ૧૮ માર્ચે શિક્ષિકા તેના ઘરે ગઈ ત્યારબાદ શું થયું તેનો જવાબ હજુ નથી મળી શક્યો. જે છોકરો શિક્ષિકાને મૃતકના ઘરે લઈ ગયો હતો તેની પણ પૂછપરછ કરવામાં આવી રહી છે. આ અંગે છોકરાના પરિવારજનો સાથે વાત કરવા પ્રયાસ કરાતા તેના કાકી જ વાત કરવાની સ્થિતિમાં હતા. તેમણે જણાવ્યું હતું કે, તે દ્રશ્યને તેઓ ક્યારેય નહીં ભૂલી શકે. છેલ્લા ત્રણ મહિનાથી તે સરખું જમતો પણ નહોતો, અને તે કોઈક સમસ્યામાં હોય તેવું લાગી રહ્યું હતું. તે આખો દિવસ રુમમાં પૂરાયેલો રહેતો હતો અને અભ્યાસમાં વ્યસ્ત છું તેમ કહી માતાને ડિસ્ટર્બ ના કરવા કહેતો હતો. છોકરો ભણવામાં ખૂબ જ હોશિયાર હતો તેમ કહેતા તેના કાકીએ જણાવ્યું હતું કે, સૌ કોઈ માનતા હતા કે તે ભવિષ્યમાં ખૂબ મોટો માણસ બનશે, પરંતુ તેનો આવો અંત આવશે તેવી કોઈએ કલ્પના નહોતી કરી.