Gujarati News

મુંબઈ, તા. ૨૭ : રિલાયન્સ ઈન્ડસ્ટ્રીઝના ચેરમેન અને મેનેજિંગ ડિરેક્ટર મુકેશ અંબાણીના મુંબઈ સ્થિત ઘર એન્ટીલિયા બહાર પાર્ક કરવામાં આવેલી વિસ્ફોટક ભરેલી કારની તપાસ કરી રહેલી મુંબઈ પોલીસની ક્રાઈમ બ્રાન્ચને મુલુંડ ટોલ પ્લાઝા પાસેથી એક સીસીટીવી ફૂટેજ મળ્યા છે, જેમાં એક ઈનોવા કાર મુંબઈ બહાર નિકળતી હોવાનું જોવા મળે છે.

મુકેશ અંબાણીના ઘર બહાર બે કાર- એક સ્કોર્પિયો અને બીજી ઈનોવા કાર પહોંચી હતી. સ્કોર્પિયોમાં બેઠેલા ડ્રાઈવરે કારને ઘર બહાર જ છોડી દીધી હતી અને ઈનોવા કારમાં બેસીને ત્યાંથી નિકળી ગયો હતો. પોલીસને એન્ટીલિયા બહાર પાર્ક કરાયેલી સ્કોર્પિયો કારમાંથી જિલેટિન સ્ટિક્સ અને એક ધમકીભર્યો પત્ર મળ્યો હતો.

મુલુંડ ટોલ પ્લાઝામાંથી મળેલા સીસીટીવી ફુટેજ મહત્વપૂર્ણ છે જેના પરથી જણાય છે કે મુલુંડ ટોલ પ્લાઝાથી કેવી રીતે આરોપી ફરાર થઈ ગયો. સીસીટીવી ફુટેજમાં આરોપી ટોલના નાણાં ચૂકવતો જોવા મળે છે. ઈનોવા કાર પૂર્વ એક્સપ્રેસ હાઈવે મારફતે ઠાણે તરફ પરત ગઈ હતી. આ ગાડી સવારે ૩.૦૫ વાગ્યે મુલુંડ ટોલ નાકું પાર કરતી દ્રશ્યમાન થઈ હતી.

મુંબઈ પોલીસે સ્કોર્પિયો વિસ્ફોટક સાથેની કાર પાર્ક કરવાના કેસમાં ગામદેવી પોલીસ સ્ટેશનમાં આઈપીસીની વિવિધ કલમો અંતર્ગત કેસ કર્યો છે. પ્રાપ્ત વિગતો મુજબ એન્ટીલિયા નજીક પાર્ક કરાયેલી કારનો રજીસ્ટ્રેશન નંબર મુકેશ અંબાણીના સુરક્ષા કાફલામાં રહેલી કારના રજીસ્ટ્રેશન નંબર સાથે મળતો હતો. પોલીસે સ્કોર્પિયોને જપ્ત કરી લીધી છે તેમજ મુકેશ અંબાણીના ઘરની સુરક્ષામાં વધારો કરી દીધો છે. ગુરુવારે સાંજે ૪ વાગ્યે પોલીસને મુકેશ અંબાણીના ઘર નજીકથી બિનવારસી કાર મળી આવી હતી.