Gujarati News

કર્ણાટકના બેંગલુરુ શહેરથી એમએલસી ચૂંટણી માટે કોંગ્રેસના ઉમેદવાર યુસુફ શરીફ ઉર્ફે કેજીએફ બાબુ ઉર્ફે સ્ક્રેપ બાબુએ ચૂંટણી પંચને પોતાનું સોગંદનામું આપીને 1,743 કરોડ રૂપિયાની સંપત્તિ જાહેર કરી છે. આ સાથે તેઓ કર્ણાટકના સૌથી ધનિક રાજનેતા બની ગયા છે. અગાઉ, શાસક ભાજપ સરકારના મંત્રી એમટીબી નાગરાજે 1,200 કરોડ રૂપિયાની સંપત્તિ જાહેર કરી હતી.અત્યાર સુધી તેઓ રાજ્યના સૌથી અમીર રાજનેતા ગણાતા હતા, પરંતુ હવે યુસુફ શરીફે તેમને પાછળ છોડી દીધા છે.

તેમના સોગંદનામામાં, 54 વર્ષીય યુસુફ શરીફે જણાવ્યું હતું કે તેમની પાસે રૂ. 1.10 કરોડની ઘડિયાળ, 4.8 કિલો સોનું અને બેંગલુરુ અને તેની આસપાસ સેંકડો એકર ખેતી અને બિનખેતીની જમીન છે, જેની કિંમત રૂ. 1,593.27 કરોડ છે. તેમણે બોલિવૂડ અભિનેતા અમિતાભ બચ્ચન પાસેથી રોલ્સ રોયસ ફેન્ટમ કાર ખરીદી હતી, જેના માટે તે તાજેતરમાં સમાચારમાં હતા. કારણ કે પરિવહન સત્તાવાળાઓએ દસ્તાવેજોના અભાવે વાહન જપ્ત કર્યું હતું.

યુસુફ શરીફ 14 ભાઈ-બહેનોમાં સૌથી મોટા છે અને ગરીબીમાં મોટા થયા છે. તે રિયલ એસ્ટેટ સહિત અનેક બિઝનેસ ચલાવે છે. સૂત્રોનો દાવો છે કે તેમની સંપત્તિ 4,000 કરોડથી વધુની છે. યુસુફ શરીફ ભારત ગોલ્ડ માઈન્સના સ્ક્રેપ મટિરિયલ ડિવિઝનમાં કામ કરતો હતો. તેના પિતાની બેકરી હતી અને જ્યારે તે ખોટમાં ગયો ત્યારે યુસુફ ઓટો ડ્રાઈવર બની ગયો. બાદમાં તેણે જંકનો ધંધો શરૂ કર્યો, જેણે તેનું નસીબ ચમકાવ્યું.

 યુસુફ શરીફના વ્યવસાયમાં મુખ્યત્વે જમીનની ખરીદી અને વેચાણનો સમાવેશ થાય છે. તેમની બે પત્નીઓ છે- રૂકાસન તાજ અને શાઝિયા તરન્નમ. તેમને પાંચ બાળકો છે. યુસુફ શરીફે 100 કરોડ રૂપિયાની જંગમ સંપત્તિ અને 1,643.59 કરોડ રૂપિયાની સ્થાવર સંપત્તિ જાહેર કરી છે.

ચિત્રદુર્ગાથી કોંગ્રેસના ઉમેદવાર બી સોમશેખરે 116 કરોડ રૂપિયાની સંપત્તિ જાહેર કરી છે, પૂર્વ મુખ્યમંત્રી જગદીશ શેટ્ટરના ભાઈ, ધારવાડથી ભાજપના ઉમેદવાર પ્રદીપ શેટ્ટરે 89 કરોડ રૂપિયાની સંપત્તિ જાહેર કરી છે. પૂર્વ વડાપ્રધાન એચડી દેવગૌડાના પૌત્ર સૂરજ રેવન્નાએ 61 કરોડ રૂપિયાની સંપત્તિ જાહેર કરી છે.