Gujarati News

નોઈડા, તા.૨૬ : ઉત્તરપ્રદેશના નોઈડામાં ૦૦૦૧ નંબરની બોલી લગાવવા માટે અત્યાર સુધીમાં ૭ લોકોએ રજિસ્ટ્રેશન કર્યું છે. જે આ સિરીઝમાં એક નંબર પર સૌથી વધારે રજિસ્ટ્રેશન છે. જ્યારે ૦૦૦૧ નંબર પર પહેલા જ દિવસે ૪,૩૩,૫૦૦ રૂપિયાની બોલી લાગી છે. આ ઘટના ઉત્તરપ્રદેશના નોઈડાની છે કે જ્યાં ૦૦૦૫, ૦૧૦૦, ૦૦૨૭, ૭૨૦૦ અને ૮૦૫૫ નંબર પર ત્રણ-ત્રણ લોકો બોલીમાં હિસ્સો લઈ રહ્યા છે. ૦૦૬૦ નંબર માટે ૨ લોકો બોલી લગાવી રહ્યા છે. અન્ય નંબરો માટે હજુ એક-એક વ્યક્તિએ જ રજિસ્ટ્રેશન કર્યું છે.

આવું પહેલી વખત નથી કે જ્યારે વીઆઈપી નંબરો માટે આટલી લાંબી લાઈન જોવા મળી છે. લોકોમાં ગાડીઓના વીઆઈપી નંબરને લઈને એટલો ક્રેઝ છે કે આ માટે તેઓ લાખો રૂપિયા ચૂકવવા માટે તૈયાર છે. ત્યાં ગત વર્ષે ૧ નંબર ૫ લાખમાં વેચાયો હોવાનું જાણવા મળે છે.

વાહનોના વીઆઈપી નંબરોના શોખીનોની ભીડને જોતા સરકારે તેની કિંમતોમાં વધારો કર્યો હતો. ઉત્તરપ્રદેશ મોટરયાન નિયમાવલી-૨૦૧૯ હેઠળ ટૂ-વ્હીલર માટે વીઆઈપી નંબરોની કિંમત રૂપિયા ૩ હજારથી ૨૦ હજાર સુધી રાખવામાં આવી છે.