Gujarati News

નવી દિલ્‍હી તા. ૨૬ : પાસપોર્ટ કેસમાં કોંગ્રેસ નેતા રાહુલ ગાંધીને કોર્ટમાંથી રાહત મળી છે. દિલ્‍હીની રાઉઝ એવન્‍યુ કોર્ટે રાહુલ ગાંધીને ત્રણ વર્ષ માટે એનઓસી આપી છે. જો કે રાહુલ ગાંધીએ કોર્ટ પાસે ૧૦ વર્ષ માટે એનઓસીની માંગણી કરી હતી, પરંતુ સુબ્રમણ્‍યમ સ્‍વામીએ તેમની માંગનો વિરોધ કર્યો હતો અને માત્ર એક વર્ષ માટે એનઓસીની પરવાનગી આપવાનું કહ્યું હતું.

સ્‍વામીએ કોર્ટમાં દલીલ કરી હતી કે રાહુલ ગાંધી પાસે ૧૦ વર્ષ સુધી પાસપોર્ટ જારી કરવા માટે કોઈ માન્‍ય કે અસરકારક કારણ નથી. રાહુલ ગાંધી ૧૦ વર્ષ માટે પાસપોર્ટ જારી કરવા માટે અયોગ્‍ય છે. ન્‍યાય અને કાયદાના વ્‍યાપક ક્ષેત્રોમાં રાહુલ ગાંધીના કેસનો નિર્ણય લેવામાં અન્‍ય તમામ સંબંધિત બાબતોની તપાસ અને વિશ્‍લેષણ કર્યા પછી અદાલત તેને મંજૂરી આપવા માટે વિવેકબુદ્ધિનો ઉપયોગ કરી શકે છે.

સુબ્રમણ્‍યમ સ્‍વામીએ તેમના જવાબમાં જણાવ્‍યું હતું કે પાસપોર્ટ રાખવાનો અધિકાર, અન્‍ય તમામ મૂળભૂત અધિકારોની જેમ, સંપૂર્ણ અધિકાર નથી અને તે રાષ્ટ્રીય સુરક્ષા, જાહેર વ્‍યવસ્‍થા, નૈતિકતા અને ગુના નિવારણના હિતમાં સરકાર દ્વારા લાદવામાં આવેલા વાજબી નિયંત્રણોને આધીન છે.

૩૧ મેના રોજ કોંગ્રેસ નેતા રાહુલ ગાંધી એક સપ્તાહ માટે અમેરિકાના પ્રવાસે જઈ રહ્યા છે. આ દરમિયાન તેઓ ૪ જૂને ન્‍યૂયોર્કના મેડિસન સ્‍ક્‍વેર ગાર્ડનમાં ભારતીય સમુદાયને સંબોધિત કરશે. આ સિવાય રાહુલ ગાંધી કેલિફોર્નિયાની એક યુનિવર્સિટીમાં એક કાર્યક્રમમાં પણ હાજરી આપશે