Gujarati News

નવી દિલ્‍હીઃ ભારતના ટોચના 20 અબજપતિની નેટવર્થમાં ચાલુ વર્ષે (2018માં) 17.85 અબજ ડોલરનું ધોવાણ થયું છે. જેમાં ટોચના પાંચ અબજપતિ ઉદ્યોગપતિએ 15 અબજ ડોલર ગુમાવ્યા છે. બ્લૂમબર્ગ બિલયનેર ઇન્ડેક્સના ડેટા પ્રમાણે ગૌતમ અદાણીની સંપત્તિમાં સૌથી વધુ 3.68 અબજ ડોલરનું ગાબડું પડ્યું છે અને તે ઘટીને 6.75 અબજ ડોલર થઈ છે. ઉલ્લેખનીય છે કે, 2014માં મોદી સરકાર બની ત્યારે તેનો સૌથી વધુ લાભ અદાણીને થવાનું ચર્ચાતું હતું.

અદાણી જૂથની ચાર કંપનીના શેરમાં 2018માં 7 ટકાથી 45 ટકાની રેન્જમાં ઘટાડો નોંધાયો છે. 2017-18માં આ ચાર કંપની અદાણી એન્ટરપ્રાઇઝિસ, અદાણી પાવર, અદાણી ટ્રાન્સમિશન અને અદાણી પોર્ટ એન્ડ સેઝનો કુલ ચોખ્ખો નફો 13.76 ટકા વધીને ₹3,546 કરોડ થયો છે.

સમાન ગાળામાં તેમનું કુલ વેચાણ 3.85 ટકાની વૃદ્ધિ સાથે ₹73,260 કરોડ રહ્યું છે. બ્લૂમબર્ગ ઇન્ડેક્સ મુજબ ધનકુબેરોની યાદીમાં અદાણી ૨૪૨મા ક્રમે છે. અદાણી પછી વિપ્રોના અઝીમ પ્રેમજીની સંપત્તિમાં પણ મોટો ઘટાડો નોંધાયો છે. ચાલુ વર્ષે વિપ્રોનો શેર 16 ટકા ઘટ્યો છે. ઉલ્લેખનીય છે કે, ટોચની ચાર IT કંપનીમાં વિપ્રો કામગીરીની બાબતમાં તળિયે છે.

એક સમયે ધનાઢ્યોની યાદીમાં નંબર 1 થયેલા દિલીપ સંઘવીની નેટવર્થ પણ 2018માં 3.48 અબજ ઘટીને 9.34 અબજ ડોલર થઈ છે. અમેરિકન બજારમાં સ્પર્ધા અને USFDAના અંકુશને કારણે સન ફાર્માનો શેર ચાલુ વર્ષે 21 ટકા ઘટ્યો છે.

કોટક સિક્યોરિટીઝના જણાવ્યા અનુસાર 2019-20ના અંદાજિત EPSના આધારે 18ના P/E રેશિયો પર શેરે હાલોલ પ્લાન્ટની સંપૂર્ણ રિકવરી અને સ્પેશિયાલિટી પ્રોડક્ટ્સનું 20 કરોડ ડોલરનું વેચાણ ડિસ્કાઉન્ટ કરી લીધું છે. બ્રોકરેજના મતે તીવ્ર સ્પર્ધાના કારણે કંપનીને સ્પેશિયાલિટી બિઝનેસમાં અવરોધો નડશે તેવી શક્યતા છે.

ભારતમાં નંબર 1 અને વિશ્વના 21મા સૌથી ધનાઢ્ય વ્યક્તિ મુકેશ અંબાણી પણ નેટવર્થના નુકસાનમાંથી બાકાત રહી શક્યા નથી. 2018માં મુકેશ અંબાણીની નેટવર્થ 2.83 અબજ ડોલર ઘટીને 37.4 અબજ ડોલર થઈ છે. ચાલુ વર્ષે રિલાયન્સના શેરમાં એક ટકા ઘટાડો નોંધાયો છે. સિનિયર અંબાણીની અન્ય કંપની રિલાયન્સ ઇન્ડસ્ટ્રિયલ ઇન્ફ્રાસ્ટ્રક્ચરના શેરમાં 25 ટકા ઘટાડો નોંધાયો છે. અંબાણી બે લિસ્ટેડ મીડિયા કંપનીમાં પણ હિસ્સો ધરાવે છે અને તેમના શેર પણ ઘટ્યા છે.

નેટવર્થના ધોવાણની યાદીમાં કુમાર મંગલમ્ બિરલા પાંચમા ક્રમે છે. બિરલા જૂથની આઠ લિસ્ટેડ કંપનીનું બજારમૂલ્ય 19.72 ટકા ઘટીને ₹2,19,904 કરોડ થયું છે. હિંદાલ્કો, આઇડિયા, અલ્ટ્રાટેક સિમેન્ટ અને આદિત્ય બિરલા જેવી કંપનીના શેર ચાલુ કેલેન્ડર વર્ષમાં 7 ટકાથી 50 ટકા સુધી ઘટ્યા છે.

બિરલાની નેટવર્થ 2.24 અબજ ડોલર ઘટીને 6.83 અબજ ડોલરે પહોંચી છે. અન્ય બિઝનેસ મહારથી અને DLFના પ્રમોટર કે પી સિંઘની સંપત્તિ ચાલુ વર્ષે 1.65 અબજ ડોલર ઘટીને 4.79 અબજ ડોલર થઈ છે. HDFC ઇન્સ્ટિટ્યૂશનલ રિસર્ચની નોંધમાં જણાવ્યા અનુસાર કંપની પાસે હજુ ₹14,300 કરોડની ઇન્વેન્ટરી છે અને DLF તેને વેચવાનો પ્રયાસ કરશે.