Gujarati News

નવી દિલ્હી, તા.૨૬: વડાપ્રધાન નરેન્દ્રભાઇ મોદીએ પોતાના સોશિયલ મીડિયા એકાઉન્ટ પર તમિલનાડુની મહિલા ખેડૂત પપ્પામ્મલ સાથેની મુલાકાતની તસવીર શેર કરી છે. આ તસવીરમાં PM મોદી શીશ ઝૂકાવીને અને હાથ જોડીને આશીર્વાદ લેતા જોવા મળી રહ્યા છે. વડાપ્રધાને પોતાના સોશિયલ મીડિયા એકાઉન્ટ પર લખ્યું છે કે- આજે કોયમ્બતૂરમાં અસાધારણ પપ્પામ્મલજી સાથે મુલાકાત થઈ. તેમને ખેતી અને ઓર્ગેનિક ફાર્મિંગના ક્ષેત્રમાં અદ્વિતિય કામ માટે આ વર્ષે પદ્મશ્રી પુરસ્કારથી સન્માનિત કરવામાં આવ્યા છે.

મૂળે, ૧૯૪૧માં જન્મેલી પપ્પામ્મલ તમિલનાડુમાં ઓર્ગેનિક ખેતી કરે છે. તેમને રાજયમાં ઓર્ગેનિક ખેતીની પ્રણેતા માનવામાં આવે છે અને તેઓ તમિલનાડુ કૃષિ યુનિવર્સિટી સાથે જોડાયેલી છે. આ ઉંમરે પણ તેઓ પોતાની ૨.૫ એકર ખેતરમાં દરરોજ કામ કરે છે. ધ હિન્દુ પર પ્રકાશિત એક રિપોર્ટ મુજબ પપ્પામ્મલ ડીએમકેની સભ્ય છે અને એમ. કરૂણાનિધિની મોટી પ્રશંસક છે.

ઉલ્લેખનીય છે કે, તમિલનાડુમાં આ વર્ષે વિધાનસભા ચૂંટણી યોજાવાની છે. વડાપ્રધાન મોદીએ આ સપ્તાહ પહેલા પણ રાજયની મુલાકાત લીધી હતી. માત્ર ત્રણ કલાક માટે ચેન્નઈ પહોંચેલા વડાપ્રધાન નરેન્દ્રભાઇ મોદીએ ત્યારે આધ્યાત્મિક ગુરૂ બંગારુ આદિગાલ સાથે મુલાકાત કરી હતી. ૮૦ વર્ષીય આદિગાલ તમિલનાડુના એવા આધ્યાત્મિક ગુરુ છે જેમનામાં તમામ પાર્ટીના લોકો આસ્થા રાખે છે. બીજેપી ઉપરાંત અન્ય પાર્ટીઓ પણ નેતા તેમને મળતા રહે છે. તમિલનાડુના ગવર્નર બનવારી લાલ પુરોહિતે પણ તેમની મુલાકાત કરી હતી.

આદિગાલને તેમના અનુયાયી અમ્માના નામે બોલાવે છે

રસપ્રદ વાત એ છે કે આદિગલને તેમના અનુયાયી અમ્માના નામથી બોલાવે છે. આ નામ તેમે 'મા જેવા પ્રેમ'ની અનુભૂતિના સંબંધમાં આપવામાં આવ્યું છે. તેઓ આદિપ્રશકિત ચેરિટેબલ મેડિકલ એજયુકેશન એન્ડ કલ્ચરલ ટ્રસ્ટના હેડ છે. ચેન્નઈથી લગભગ ૯૦ કિલોમીટર દૂર વિલ્લુપુરમમાં આ ટ્રસ્ટની એક મેડિકલ કોલેજ, કેટલીક એન્જિનિયરિંગ કોલેજ અને અનેક શિક્ષણ સંસ્થાન છે.