Gujarati News

લંડન તા. ૨૫ : બ્રિટનના રાજવી પરિવારના પ્રિન્સ હેરીનો એક વીડિયો ઈન્ટરનેટ ખૂબ વાયરલ થઈ રહ્યો છે. દાવો કરવામાં આવી રહ્યો છે કે, આ વીડિયોમાં પ્રિન્સ હેરી સમોસું છૂપાવીને લઈ જઈ રહ્યાં છે. ITV Newsએ પોતાના ટ્વીટર હેન્ડલ પર આ વીડિયો શેર કર્યો છે. વીડિયોને શેર કરતા ન્યૂઝ ચેનલે લખ્યું કે, 'ભૂખ્યા પ્રિન્સ હેરી કુકબુકના લોન્ચિંગ કાર્યક્રમમાં સ્નેક લઈને જતા રંગેહાથ ઝડપાઈ ગયા.'

આ વીડિયોમાંને જોયા બાદ અન્ય ઘણા મીડિયા રિપોર્ટ્સમાં દાવો કરવામાં આવ્યો છે કે, પ્રિન્સ હેરીના હાથમાં દેખાઈ રહેલી વસ્તુ સમોસુ જ છે. વીડિયોમાં દેખાઈ રહ્યું છે કે, પ્રિન્સ ફૂડ સ્ટોલની પાસેથી પસાર થાય છે ત્યારે તેમણે પોતાના હાથમાં નેપકિનની અંદર કોઈ વસ્તુ છૂપાવી રાખી છે, જોકે, આ વસ્તુ શું છે તે સાફ-સાફ દેખાઈ રહ્યું નથી.

કેમેરામાં પ્રિન્સ હાથમાં કોઈ વસ્તુ છૂપાવીને આરામથી જતા દેખાઈ રહ્યાં છે. આ દરમિયાન તે ઘણીવાર એવો પ્રયત્ન કરે છે કે, તેમના હાથમાં છૂપાવેલી વસ્તુ કોઈને દેખાઈ ન જાય. અચાનક તેમને એ વાતનો અહેસાસ થઈ જાય છે કે, કેમેરા તેમને જોઈ રહ્યો છે. ત્યારબાદ હેરી સ્માઈલ કરવા લાગે છે. બાદમાં તે ગાડીમાં બેસીને ત્યાંથી નીકળી જાય છે.

પ્રિન્સ હેરી પોતાની પત્ની મેગન માર્કેલ સાથે એક કુકબુકના લોન્ચિંગમાં પહોંચ્યા હતા. કેંસિંગ્ટન પેલેસમાં મેગન પોતે આ ઈવેન્ટને હોસ્ટ કરી રહી હતી. કુકબુકમાં ગ્રેનફેલ ટાવર અગ્નિકાંડ – ૨૦૧૭થી પીડિત મહિલાઓ દ્વારા લખવામાં આવેલી રેસિપી છે. આ મેગનનો એક ચેરિટી વર્કશોપ હતો.(૨૧.૬)