Gujarati News

એટલાન્ટા: બેલ્જિયમની ચેમ્પિયન ખેલાડી મરીકી વરવૂર્ટે ઇચ્છામૃત્યુ દ્વારા પોતાના જીવનનો અંત કર્યો છે. લંડન પેરાલિમ્પિકમાં ગોલ્ડ મેડલ જીતનાર મરીકીની ઉંમર 40 વર્ષ હતી. તેમણે મંગળવારે ઇચ્છામૃત્યુ દ્વારા પોતાના જીવનનો અંત લાવી હતી. ઇચ્છામૃત્યુ બેલ્જિયમમાં કાયદેસર છે. પેરાલિમ્પિયન મરીકી વરવૂર્ટે 2016 રિયો પેરાલિમ્પિક બાદ જાહેરાત કરી હતી કે જો બિમારીના કારણે તેની સ્થિતિ વધારે ખરાબ થશે તો તેઓ ઇચ્છામૃત્યુ પસંદ કરી શકે છે. બેલ્જિયમ ઉપરાંત નેધરલેન્ડ, કોલમ્બિયા, લક્ઝમબર્ગ અને કેનેડામાં ઇચ્છા મૃત્યુ કાયદેસર છે.

મરીકી વરવૂર્ટે લંડન પેરાલિમ્પિક-2012માં 100 મીટર વ્હીલચેર રેસમાં ગોલ્ડ મેડલ જીત્યો હતો. તેણે 200 મીટર દોડમાં પણ સિલ્વર મેડલ પોતાના નામે કર્યો હતો. મરીકીએ 40 વર્ષ બાદ રિયો પેરાલિમ્પિકમાં પણ બે મેડલ પોતાના નામે કર્યા હતા. તેણે રિયોમાં 400 મીટર વ્હિલચેર રેસમાં સિલ્વર અને 100 મીટર રેસમાં બ્રોન્ઝ મેડલ જીત્યો હતો.

મરીકી વરવૂર્ટે રિયો પેરાલિમ્પિક દરમિયાન પ્રેસ કોન્ફરેન્સમાં કહ્યું હતું કે, હું અત્યારે તમામ ક્ષણની મજા માણી રહી છું. મને હવે મોતનો ડર લાગતો નથી. મને આ એક ઓપરેશનની જેમ લાગે છે. જેમાં તમે સૂઈ જાઓ છો અને ફરી ક્યારેય ઉઠશો નહીં. મારા માટે તે શાંતિનો માર્ગ છે. હું મૃત્યુ માટે પીડાવવા નથી માગતી. જ્યારે આવો સમય આવશે, ત્યારે હું ઈચ્છામૃત્યુનો વિકલ્પ પસંદ કરીશ. દસ્તાવેજો તૈયાર છે.

મરીકી વરવૂર્ટે 14 વર્ષની ઉંમરથી સ્નાયુઓની બિમારીથી પીડિત હતી. તેના પગ લકવાગ્રસ્ત હતા. તેણીને આખો સમય પીડા રહેતી હતી અને તે મુશ્કેલીથી સૂઈ શકતી હતી. તાજેતરના સમયમાં, મરીકી વરવૂર્ટની દૃષ્ટિ ઘણી ઓછી થઈ ગઈ હતી અને તેને વાઈના દુ: ખાવો આવ્યો હતો. તેણે 2008માં જ ઈચ્છામૃત્યુના દસ્તાવેજો પર સહી કરી હતી. ચેમ્પિયન ખેલાડીએ તેની વેદનાને સમાપ્ત કરવા માટે મંગળવારે ઈચ્છામૃત્યુનો માર્ગ પસંદ કર્યો હતો.