Gujarati News

તહેરાન : ઈરાનમાં, 22 વર્ષની કુર્દિશ છોકરીના કસ્ટોડિયલ મૃત્યુને લઈને સરકાર સામે વ્યાપક વિરોધ લગભગ 80 શહેરોમાં ફેલાઈ ગયો છે. હિજાબ કાયદાનું ઉલ્લંઘન કરવા બદલ પોલીસે અમીની નામક મહિલાની ધરપકડ કરી હતી.

યુએનના માનવાધિકાર માટેના કાર્યકારી કમિશનર નદા અલ-નશીફે જણાવ્યું હતું કે અહેવાલોમાં દાવો કરવામાં આવ્યો છે કે પોલીસે અમીનીના માથા પર લાકડી વડે માર્યો હતો અને તેનું માથું વાહન સાથે પછાડ્યું હતું.

મહસા અમીનીના મૃત્યુ બાદ સેંકડો વિરોધીઓ શેરીઓમાં ઉતરી આવ્યા હતા, ઇસ્લામિક શાસન અને દેશના સર્વોચ્ચ નેતા આયાતુલ્લાહ અલી ખામેનેઇને નિશાન બનાવતા સરકાર વિરોધી સૂત્રોચ્ચાર કર્યા હતા. દેખાવકારોમાં મોટાભાગની મહિલાઓ હતી

ઈરાનના સરકારી ટેલિવિઝનએ શુક્રવારે જણાવ્યું હતું કે સુરક્ષા દળો સાથેની હિંસક અથડામણમાં મૃત્યુઆંક વધીને 26 થઈ ગયો છે. અશાંતિ તાજેતરના વર્ષોમાં સૌથી વધુ વ્યાપક હોવાનું કહેવાય છે, જે લગભગ 80 ઈરાનના શહેરોમાં ફેલાઈ છે. તેમાં કહેવામાં આવ્યું છે કે મશહાદ, કુચાન, શિરાઝ, તબરીઝ અને કરજમાં દેખાવકારોને કાબૂમાં લેવાના પ્રયાસો દરમિયાન ઓછામાં ઓછા પાંચ સુરક્ષાકર્મીઓ માર્યા ગયા હતા અને અન્ય કેટલાક ઘાયલ થયા હતા.

મહિલાઓ શેરીમાં હિજાબ સળગાવે છે

અમીનીના મૃત્યુથી ઈસ્લામિક રાષ્ટ્રમાં વ્યક્તિગત સ્વતંત્રતા પરના નિયંત્રણોને લઈને લાંબા સમયથી ચાલતા રોષની લાગણી ફેલાઈ છે. છેલ્લા કેટલાક દિવસોમાં, કેટલીક વિરોધ કરતી મહિલાઓએ તેમના હિજાબને શેરીઓમાં સળગાવી દીધા હતા, જેને અવગણનાના અભૂતપૂર્વ કૃત્ય તરીકે જોવામાં આવે છે. તે જ સમયે, વિરોધ કરી રહેલા લોકોએ ક્યુમ અને ઇસ્ફહાન જેવા ધાર્મિક શહેરો સહિત અનેક શહેરોમાં સર્વોચ્ચ નેતાના પોસ્ટરો સળગાવી દીધા હતા.તેવું એચ.ટી.એચ.દ્વારા જાણવા મળે છે