Gujarati News

લખનૌ,તા. ૨૪ : ભાજપ સાંસદ જનાર્દન મિશ્રાનો વિડિયો સોશિયલ મીડિયા પર ખૂબ વાયરલ થઈ રહ્યો છે. રીવાના સાંસદ ગુરુવારે એક શૌચાલયની સફાઈ કરતા જોવા મળ્‍યા હતા. તેમણે ખુલ્લા હાથ વડે જ આ શૌચાલયને સાફ કર્યું હતું. તેમણે હાથમાં બ્રશ અને ગ્‍લવ્‍સનો પણ ઉપયોગ કર્યો ન હતો. સાંસદ જે શૌચાલયને સાફ કરી રહ્યા હતા, તે ગર્લ્‍સ સ્‍કૂલનું શૌચાલય હતું. શૌચાલયની સફાઈ કરતી વખતે તેમનો વિડિયો સમર્થકો દ્વારા તૈયાર કરવામાં આવ્‍યો હતો. ત્‍યારબાદ તેમણે આ વિડિયો જાતે જ ટ્‍વિટ કર્યો અને પીએમ મોદીને ટેગ કર્યાં છે.

ગુરુવારે સવારે ભાજપ યુવા મોરચાએ વૃક્ષારોપણ કાર્યક્રમનું આયોજન કર્યું હતું. તેમાં ભાગ લેવા માટે સાંસદ મઉગંજ સ્‍થિત ખટવારી વિસ્‍તારમાં પહોંચ્‍યા હતા. અહીં પહોંચ્‍યા બાદ તેઓ શાસકીય ગર્લ્‍સ સ્‍કૂલ પહોંચ્‍યા હતા. નિરીક્ષણ કરતી વખતે સ્‍કૂલનું શૌચાલય ગંદુ જોવા મળ્‍યું હતું. ત્‍યારબાદ સાંસદ શૌચાલયને હાથ વડે જ સાફ કરવા લાગ્‍યા હતા. શૌચાલય સાફ કરવા માટે તમણે બ્રશ અને ગ્‍લવ્‍સની પણ વ્‍યવસ્‍થા કરી ન હતી. આ દરમિયાન સાંસદ જાતે જ પાણીની વ્‍યવસ્‍થા કરીને સફાઈ કરવા જોડાઈ ગયા હતા.

થોડી વાર બાદ તેમણે ટોયલેટને ચકાચક પણ કરી દીધુ હતું. ત્‍યારબાદ પીએમ મોદી સહીત ભાજપના મોટા નેતાઓને આ વિડિયો ટ્‍વિટ કર્યો હતો. આ વિડિયો હવે વાયરલ થઈ રહ્યો છે. હકીકતમાં પોતાના નિવેદનબાજી અને કાર્યપદ્ધતિને લઈ અવાર-નવાર ભાજપ સાંસદ જનાર્દન મિશ્રા સતત ચર્ચામાં રહ્યા છે. હવે ટોયલેટની સફાઈ કરી તેઓ વ્‍યાપક પ્રમાણમાં ચર્ચામાં છે. આ અગાઉ પણ તેઓ અનેક વખત ટોયલેટની સફાઈ કરી ચુક્‍યા છે.

આ અગાઉ તેઓ રીવાના બંસલ બસ્‍તી કોલોનીમાં ગંદકીની સફાઈ કરતા જોવા મળ્‍યા છે. તેઓ વર્ષ ૨૦૧૪માં ભાજપ સાંસદ જનાર્દન મિશ્રાને સ્‍વચ્‍છતાના બ્રાન્‍ડ એન્‍બેસેડર પણ બનાવવામાં આવ્‍યા હતા. સ્‍વચ્‍છ ભારત મિશન અંતર્ગત ચોતરફ સ્‍વચ્‍છતા જાળવી રાખવા માટે સાંસદ સતત પ્રયત્‍નશીલ રહ્યા છે. કોરોના કાળમાં પણ તેણે જાતે જ સિલાઈ મશીન પર માસ્‍ક બનાવી વિતરણ કર્યું હતું.