Gujarati News

મુંબઈ :રિલાયન્સ ઇન્ડસ્ટ્રીઝની 44 મી વાર્ષિક સામાન્ય સભા દરમિયાન, ચેરમેન અને મેનેજિંગ ડિરેક્ટર મુકેશ અંબાણીએ પણ RILના વૈશ્વિકરણની જાહેરાત કરી હતી. આ દરમિયાન તેમણે કહ્યું હતું કે આગામી સમયમાં કંપનીની વૈશ્વિક યોજનાઓની જાહેરાત કરવામાં આવશે. તેમણે રિલાયન્સ બોર્ડમાં સાઉદી Aramcoના અધ્યક્ષ, યાસીર અલ-રૂમાય્યાનને પણ શામેલ કરવામાં આવ્યા છે. સીએમડી મુકેશ અંબાણીએ યાસીર અલ-રૂમાય્યાનને કંપની બોર્ડમાં આવકારતાં કહ્યું કે રિલાયન્સના વૈશ્વિકરણની આ શરૂઆત છે.

યાસીર અલ રૂમાય્યાન સ્વતંત્ર ડિરેક્ટર તરીકે રિલાયન્સ બોર્ડમાં સામેલ કરવામાં આવ્યા છે. 2019 ની વાર્ષિક સામાન્ય સભામાં રિલાયન્સે સાઉદી Aramcoને ઓઇલ-ટુ કેમિકલ (ઓ 2 સી) બિઝનેસમાં 20 ટકા હિસ્સો વેચવાની જાહેરાત કરી હતી. આ ડીલમાં ગુજરાતના જામનગર ખાતે બે ઓઇલ રિફાઈનરીઓ અને પેટ્રો કેમિકલ સંપત્તિનો સમાવેશ છે. આ સિવાય સીએમડી મુકેશ અંબાણીએ જણાવ્યું હતું કે છેલ્લા એજીએમથી અમારો ધંધો અને નાણાં અપેક્ષા કરતા વધારે વધ્યા છે. રિલાયન્સ ઇન્ડસ્ટ્રીઝે કોરોના સંકટ પછી પણ છેલ્લા 1 વર્ષમાં 75,000 નવી નોકરીઓ આપી છે. આ દરમિયાન તેમણે જણાવ્યું હતું કે, RILની પેટાકંપની રિલાયન્સ રિટેલ આગામી 3 વર્ષમાં 10 લાખથી વધુ લોકોને રોજગાર આપશે.