Gujarati News

કુલ્લુ,તા.૨૪: કેન્દ્રીય મંત્રી નિતિન ગડકરી હિમાચલ પ્રદેશના કુલ્લુના ભુંતર પહોંચ્યા હતા. નિતિન ગડકરીના સ્વાગત દરમિયાન તેમની જ હાજરીમાં જ મુખ્યમંત્રી જયરામ ઠાકુરની સુરક્ષામાં તૈનાત સુરક્ષા અધિકારી અને કુલ્લુના એસ.પી. ગૌરવ વચ્ચે જોરદાર મારામારીની ઘટના બની હતી. ત્યાં હાજર કેટલાંક લોકોએ મારામારીનો વીડિયો મોબાઈલમાં ઉતાર્યો કર્યો હતો અને આ વીડિયો હાલ સોશિયલ મીડિયામાં ખૂબ વાઇરલ થયો છે. વીડિયોમાં સુરક્ષાકર્મી એસ.પી.ને લાત અને છૂટ્ટા હાથથી મારામારી કરતા નજરે પડે છે. જો કે, આ મારામારી કયા કારણોસર થઈ તે હજુ સુધી જાણવા મળ્યું નથી.

વાત એમ છે કે, કેન્દ્રીય માર્ગ અને પરિવહન મંત્રી નિતિન ગડકરી બુધવારે મનાલીની મુલાકાતે હતા. તેમના સ્વાગત માટે હિમાચલ પ્રદેશના મુખ્યમંત્રી જયરામ ઠાકુર ભુંતર એરપોર્ટ પહોંચ્યા હતા. રસ્તામાં જ કેટલાંક ફોરલેન અસરગ્રસ્ત ખેડુતો પણ તેમને મળવા પહોંચ્યા હતા. ખેડુતોને જોઈને નિતિન ગડકરીએ પોતાની કાર રસ્તાની બાજુમાં ઊભી રખાવી અને તેઓને મળવા પહોંચ્યા. ત્યારબાદ મુખ્યમંત્રી જયરામ ઠાકુર પણ ખેડુતોને મળવા પહોંચ્યા.

ત્યારે અચાનક મુખ્યમંત્રીની કારની પાછળની બાજુએ સુરક્ષાકર્મી અને કુલ્લુના એસ.પી. વચ્ચે મારામારી થઈ ગઈ. જો કે, આ મારામારી કયા કારણોસર થઈ એ હજુ સુધી જાણવા મળ્યું નથી. જો કે, ત્યાં હાજર કેટલાંક લોકોએ આ મારામારીનો વીડિયો પોતાના મોબાઈલમાં ઊતાર્યો હતો અને બાદમાં તેને સોશિયલ મીડિયામાં વાઇરલ કર્યો હતો. વીડિયોમાં સુરક્ષાકર્મી એસ.પી.ને લાતથી અને છૂટ્ટા હાથથી માર મારતા સ્પષ્ટ દેખાઈ રહ્યાં છે.

તો આ ઘટના બાદ અફવાઓનું બજાર પણ ગરમ થઈ ચૂકયુ છે, પરંતુ આ મારામારીને લઈને કોઈ બોલવા માટે તૈયાર નથી. આ ઘટના બાદ કેટલાંક લોકો એસ.પી.ના સમર્થનમાં સુત્રોચ્ચાર કરતા પણ જોવા મળ્યાં. વાઇરલ વીડિયોમાં સ્થાનિક લોકો જયાં રાજય સરકારનો વિરોધ કરતા નજરે પડી રહ્યાં છે તો બીજી તરફ, કુલ્લુના એસ.પી.ની કામગીરીથી ખુશ થઈને તેમની તરફેણમાં સુત્રોચ્ચાર પણ કરી રહ્યાં છે.