Gujarati News

રાજકોટઃ તા.૨૪, લોકસભા ચૂંટણીની ગઇકાલે મતગણતરી મોડી રાત સુધી ધમધમતી રહી હતી. કલેકટર તંત્ર દ્વારા આ અંગે અગાઉથી જ પૂર્ણ તૈયારી કરી લેવામાં આવી હતી. મતગણતરી બાદ તમામ ઇવીએમ-વીવીપેટને જંકશન પ્લોટ ખાતેના પુરવઠાના ગોડાઉનના સ્ટ્રોંગ રૂમમાં મુકી દેવામાં આવ્યા છે.

કલેકટર રાહુલ ગુપ્તાના માર્ગદર્શન હેઠળ તંંત્ર દ્વારા ગઇકાલે કણકોટ કોલેજ ખાતે મતગણતરી પ્રક્રિયા હાથ ધરવામાં આવેલ. આ અંગે તંત્રને એક બુથ દીઠ લગભગ ૪૦ હજાર જેટલો ખર્ચ થયો છે. જેમાં ચૂંટણી ફરજમાં રહેલ કર્મચારીઓનો પગાર, ટેબલ-ખુરશીનું ભાડૂ, પાણી, લાઇટ બીલ તથા  અન્ય ખર્ચનો સમાવેશ થાય છે.  સમગ્ર પ્રક્રિયામાં કુલ ૮ કરોડનો ખર્ચ થયો છે. આ અંગે ચૂંટણી પંચ દ્વારા ૩ કરોડ અગાઉથી ફાળવી દેવામાં આવેલ.

વધુના ખર્ચ માટે દરેક વિધાનસભાના હિસાબ આવ્યા બાદ વધુ ૫ કરોડ માટે ચૂંટણી પંચ પાસે માંગણી કરવામાં આવશે. રાત્રે ૨ વાગ્યા સુધી મતગણતરી પ્રક્રિયા ચાલી હતી. ત્યારબાદ મામલતદારે ખાસ રીપોર્ટ મુખ્ય ચૂંટણી અધિકારીને સોંપ્યો હતો. મતગણતરી શાંતિપૂર્ણ રીતે થતા સમગ્ર કલેકટર તંત્રએ હાશકારો અનુભવ્યો હતો.