Gujarati News

તિરુનેલવેલી, તા.૨૪ : બે ટંક ખાવાના પણ જેને ફાંફા હોય તેની સામે ૫૮,૨૧૦ રુપિયા ભરેલું પર્સ મળે તો? સ્વાભાવિક છે કે, આવી સ્થિતિમાં વ્યક્તિ 'કદાચ ભગવાને જ મદદ કરી છે..' એવું માનીને પણ તે રુપિયાના મૂળ માલિકને શોધવાનો પ્રયાસ ના કરે. પરંતુ, કચરો વિણીને રોજના માંડ ૨૦૦-૩૦૦ રુપિયા કમાતી તમિલનાડુની મરિઅમ્મલ કદાચ નોખી માટીની છોકરી હતી, જેણે જેવા આ રુપિયા મળ્યા કે તરત જ પોલીસ સ્ટેશનની વાટ પકડી. મહેનત કરીને જ ખાવામાં માનતી મરિઅમ્મલ જ્યારે રોજની જેમ બુધવારે પણ કચરો વીણવા નીકળી હતી ત્યારે તેને એક પર્સ મળ્યું હતું. પર્સમાં કંઈક છે તેવું લાગતા તે સીધી મુક્કુડાલ પોલીસ સ્ટેશન પહોંચી હતી. તેણે પોલીસને પોતાને મળેલું પર્સ સોંપી દીધું. જ્યારે પર્સને ચેક કરવામાં આવ્યું ત્યારે તેમાંથી ૫૮,૨૧૦ રુપિયા નીકળતા પોલીસ પણ આ યુવતીની પ્રામાણિકતા જોઈ અચરજમાં મૂકાઈ ગઈ હતી.

મરિઅમ્મલ પોતાની પરિચિત મહિલાઓ સાથે બુધવારે કચરો વીણી રહી હતી ત્યારે તેને એક પર્સ મળ્યું હતું. તેણે પર્સ હાથમાં લીધું તે સાથે જ તે વાઈબ્રેટ થવા લાગ્યું હતું. તેની અંદર એક મોંઘો ફોન અને કેટલાક રુપિયા હતા. પર્સ કોઈ જરુરિયાતમંદ વ્યક્તિનું હશે તેમ માની મરિઅમ્મલ તરત જ પોલીસ સ્ટેશન દોડી ગઈ હતી.

આ ઘટનાની જાણ થતાં તિરુનેલ્વેલી જિલ્લાના એસપીએ આ યુવતીનું અભિવાદન કરી તેની પ્રામાણિકતાની સરાહના કરી હતી. તેનો પરિવાર તમિલનાડુની એક આદિજાતિનો છે, જે મોટાભાગે ભિક્ષાવૃત્તિ કરીને કે પછી કચરો વીણવા જેવા કામ કરીને ગુજરાન ચલાવે છે. મરિઅમ્મલની ચાર બહેનો પરણી ગઈ છે, અને તે પોતાના માતાપિતા સાથે રહે છે.

તેની જાતિના અન્ય લોકોની માફક મરિઅમ્મલ પણ પાંચમા ધોરણથી આગળ નહોતી ભણી શકી. કારણકે, તેની પાસે જાતિનું પ્રમાણપત્ર નહોતું. સ્કૂલ છોડ્યા બાદ તેણે કચરો વીણવાનું કામ શરુ કર્યું હતું. તેનો પરિવાર એટલો ગરીબ છે કે તેની પાસે મોબાઈલ ફોન પણ નથી. ચાર દીકરીોને પરણાવવામાં તેના બાપે ત્રણ લાખ રુપિયાનું દેવું કરી દીધું છે, જેને જેમ તેમ કરીને મરિઅમ્મલ અને તેના માતાપિતા ચૂકવી રહ્યા છે.

પોલીસે મરિઅમ્મલનું સમ્માન કરીને તેને ભેટ આપી હતી. પર્સના મૂળ માલિકે પણ તેને એક હજાર રુપિયાનું ઈનામ આપ્યું હતું.

શુક્રવારે આ બાબતે જાણ થતાં એક પ્રાઈવેટ સ્કૂલે પણ મરિઅમ્મલનું સમ્માન કરી તેને દસ હજાર રુપિયાનો પુરસ્કાર આપ્યો હતો. મરિઅમ્મલે દાખવેલી પ્રામાણિકતાની સોશિયલ મીડિયા પર પણ ખૂબ વાહવાહી થઈ રહી છે. જોકે, તેને તેની કોઈ જાણ નથી, કારણકે આ ગરીબ યુવતી પાસે તો ફોન જ નથી.