Gujarati News

નવી દિલ્હી :દિલ્હીને પ્રદુષણથી મુક્ત કરવા બનતા ઈસ્ટર્ન પેરિફેરલ એક્સપ્રેસ વે 500 દિવસના રેકોર્ડ સમયમાં બનીને તૈયાર થઇ જશે  નેશનલ હાઈવે ઓથોરિટી ઓફ ઈન્ડિયાના એક અધિકારીએ જણાવ્યાનુસાર સરકારે આ રસ્તાના નિર્માણ માટે 910 દિવસની સમયમર્યાદા નક્કી કરી હતી. પરંતુ હવે તે અડધા સમયમાં જ બનીને તૈયાર થઈ જશે. આ મહિનાના અંતમાં વડાપ્રધાન મોદી અને કેન્દ્રિય પરિવહન મંત્રી નિતિન ગડકરી એક્સપ્રેસ વેનું ઉદ્ઘાટન કરશે.
    135 કિ.મી લાંબો આ એક્સપ્રેસ વે પલવલ, ગાઝિયાબાદ અને નોએડાને જોડશે. જેથી હરિયાણાથી યુપી અને યુપીથી હરિયાણા જતાં વાહનોને દિલ્હીથી થઈને નહિ જવું પડે. આ એક્સપ્રેસવે દેશનો સૌથી ઝડપી રસ્તો હશે. જ્યાં વાહનોને 120 કિ.મી પ્રતિકલાકની સ્પીડથી ચાલવાની પરવાનગી હશે.
   આ એક્સપ્રેસ વેના કારણે સફરનો સમય ઓછો થશે અને દિલ્હીમાં વાહનોને કારણે થતું પ્રદુષણ પણ ઓછું થશે. એનએચઆઈના ચીફ જનરલ એન્જિનિયર બીએસ સિંગલાએ જણાવ્યું કે આ એક્સપ્રેસ વેની ખાસિયત એ હશે કે તમારે એટલો જ ટેક્સ ચૂકવવો પડશે જેટલી સફર તમે કરો છો. આટલું જ નહિ ટોલ કલેક્શન પર ઈલેક્ટ્રોનિક વ્યવસ્થા હશે જેથી ટ્રાફિક પર અસર ન પહોંચે.
    સિંગલાએ જણાવ્યું કે,’આ ઉપરાંત અમે એકસપ્રેસ વેના દરેક એન્ટ્રી પોઈન્ટ્સ પર એવા સેન્સર લગાવ્યાં છે. જેનાથી ઓવરલોડ વાહનોની જાણ થઈ શકે. જેથી તેમને એકસપ્રેસ વે પર એન્ટ્રી નહિ મળે.’ સામાન્ય રીતે ટોલ પ્લાઝા પર આ રીતના સેન્સર લગાવેલા હોય છે. જેથી વાહન ઓવરલોડ હોય તો તે પરત ફરે છે. જોકે, એક્સપ્રેસ વેના એન્ટ્રી પોઇન્ટ્સ પર આવા જ સેન્સર હશે. જેથી ઓવરલોડ વાહનોની એન્ટ્રી જ ન થાય.
   સિંગલાએ એ પણ જણાવ્યું કે,’અમે એક્સપ્રેસ વે પાસે પાર્કિંગની પણ સુવિધા આપી છે. જેથી ઓવરલોડેડ ટ્રક પોતાનો સામાન ત્યાં ઉતારી શકે અને આગળ જઈ શકે. દેશમાં આ રીતનો પહેલો પ્રયોગ છે. આ ઉપરાંત વાહનોની ગતિ પર નિયંત્રણ રાખવા માટે બે કિ.મીના અંતરે કેમેરા લગાવવામાં આવ્યાં છે. નિશ્ચિત સ્પીડ કરતાં વધારે સ્પીડથી ચાલતા વાહનોને દંડ ફટકારવામાં આવશે.’