Gujarati News

વોશિંગ્ટન,તા.૨૩ : અમેરિકામાં કોલોરાડોની કિંગ્સ શોપર્સ સુપરમાર્કેટમાં અંધાધૂંધ ગોળીબારની ઘટનામાં ઓછામાં ઓછા ૬ લોકોનાં મોત થયા હોવાના અહેવાલો પ્રાપ્ત થયા છે. પોલીસના અનુસાર, આ ઘટનામાં શંકાસ્પદ ગણાતા વ્યક્તિને ઝડપી લેવાયો છે. આ શંકાસ્પદ હુમલાખોર પણ પોલીસ ગોળીબારમાં ઈજાગ્રસ્ત થયો હોવાથી તેને સારવાર માટે હોસ્પિટલે લઈ જવાયો છે.આ ગોળીબારની ઘટના વિશે હાલ બોઉલ્ડર પોલીસ વધુ વિગત આપી શકી નથી. હુમલાખોરે ગોળીબાર કયા હેતુથી કર્યો એ અંગે પોલીસ તપાસ કરી રહી છે. કોલોરાડોની કિંગ્સ શોપર્સ સુપરમાર્કેટમાં થયેલા ગોળીબારની ઘટનામાં મૃત્યુઆંક વધવાની આશંકા પોલીસે વ્યક્ત કરી છે. એક પોલીસકર્મીને પણ ઈજા થઈ હોવાના અહેવાલો મળ્યા છે.

ઘટનાને નજરે જોનાર એક વ્યક્તિએ કહ્યું હતું કે સુપર માર્કેટ ફ્લોર પર ઘાયલ અવસ્થામાં તેણે અનેક લોકોને જોયા હતા. જો કે કેટલા લોકો મૃત્યુ પામ્યા છે તેનો ચોક્કસ આંકડો તે વ્યક્તિ જણાવી શકી નહોતી. બોઉલ્ડરમાં આવેલી સુપરમાર્કેટમાં આ ઘટનાને નજરે નિહાળનારા એક વ્યક્તિ ડીન શિલરે કહ્યું હતું કે તેણે ગોળીબારના અવાજ સાંભળ્યા અને ત્રણ લોકોને નીચે પડી જતા જોયા હતા. જેમાં બે પાર્કિંગ લોટમાં ગોળી વાગવાથી ઢળી પડ્યા હતા જ્યારે અન્ય એક વ્યક્તિને દરવાજા પાસે ગોળી વાગી હતી. શિલરે કહ્યું હતું કે ગોળી વાગી એ લોકો જીવિત છે કે નહીં એ ખબર નથી.