Gujarati News

નવી દિલ્હીઃ સાઉદી અરબે ઇઝરાયેલ જતા વિમાનને પહેલી વખત આકાશમાંથી પસાર થવા માટે મંજૂરી આપતા એર ઇન્ડિયાનું વિમાન પહેલી વાર ઇઝરાયેલના  બેન ગુરિયન એરપોર્ટ ઉપર પહોંચ્યુ હતું.

હાલમાં જ સાઉદી અરબે સંકેત આપ્યા હતા કે તે ભારતથી ઇઝરાયેલ જતી અને ઈઝરાયેલથી ભારત આવતી ફ્લાઇટ્સ માટે પોતાનું આકાશ યુઝ કરવા દેશે. હકીકતમાં તો ઈરાન સાથેના સાઉદી અરબના તણાવયુક્ત સંબંધોને જ ઈઝરાયેલ તરફ તેના નરમ વલણનું કારણ ગણવામાં આવે છે. ઇઝરાયેલના પર્યટન પ્રધાન યારિવ લેવિને કહ્યું કે, ‘ખરેખર આ એક ઐતિહાસિક દિવસ છે. બે વર્ષની મહેનત બાદ આ કામ થઈ શક્યું છે.’

સાઉદી અરબ દ્વારા પોતાનું આકાશ ખોલી નાખવામાં આવતા ભારત અને ઈઝરાયેલ વચ્ચેનો પ્રવાસ સમય ટુંકો થઈ જશે. આ કારણે કુલ પ્રવાસમાં 2 કલાક જેટલો સમય બચશે અને આ સાથે જ વિમાન કંપનીઓનું ફ્યુઅલ બચતા ટિકિટની કિંમત પણ ઘટી શકે છે. જોકે સાઉદી અરબ દ્વારા આપવામાં આવેલ આ છૂટ ફક્ત ભારતીય એરલાઇન્સ માટે જ છે. ઈઝરાયેલી એરલાઇન્સને આ છૂટ નથી આપવામાં આવી. કેમકે ઇસ્લામિક દેશ હોવાથી સાઉદી અરબ ઈઝરાયેલને દેશ તરીકે સ્વીકરાતું નથી.