Gujarati News

મુંબઈ, તા.૨૩ : લગ્ન થયા ત્યારથી પ્રિયંકા ચોપરા અને નિક જોનસ ફેન્સને કપલ્સ ગોલ્સ આપતા આવ્યા છે. જો કે, સોમવારે એક્ટ્રેસે જ્યારે તેના ઈન્સ્ટાગ્રામ અને ટ્વિટર અકાઉન્ટ પરથી તેની અટક ચોપરા અને જોનસ હટાવી ત્યારે તેના ફેન્સ તેમજ ફોલોઅર્સને આંચકો લાગ્યો હતો.

એક્ટ્રેસના આ પગલાથી નિક અને તેની વચ્ચે કંઈક ઠીક ન ચાલી રહ્યું હોવાનું ફેન્સને લાગ્યું હતું, તો કેટલાક સોશિયલ મીડિયા યૂઝર્સે તેઓ અલગ થઈ રહ્યા હોવાની પણ અટકળો શરૂ કરી હતી.

પ્રિયંકા ચોપરાના મમ્મી મધુ ચોપરાએ આ મામલે પ્રતિક્રિયા આપી હતી. તેમણે તેમની દીકરી પતિ નિક જોનસથી અલગ થઈ રહી હોવાના આક્ષેપોને ફગાવ્યા હતા. એક ન્યૂઝ પોર્ટલ સાથે વાતચીત કરતાં તેમણે કહ્યું હતું કે, આ બધી અફવા ખોટી છે, સાથે તેમણે ફોલોઅર્સને ખોટી માહિતી ન ફેલાવવા માટે પણ કહ્યું હતું.

મુંબઈમાં રહેતી પ્રિયંકા ચોપરાની ખાસ ફ્રેન્ડનો સંપર્ક કર્યો હતો. તેણે નામ જાહેર ન કરવાની શરત પર કહ્યું હતું કે, 'આવી પાયાવિહોણી અફવા પર વિશ્વાસ કરશો નહીં'. તેણે ઉમેર્યું હતું કે, સોશિયલ મીડિયા ફોલોઅર્સે વધારે પડતું વિચારવાની વૃતિ વિકસાવી લીધી છે. પ્રિયંકા ચોપરા હાલમાં જ નિક જોનસ સાથે તેમના નવા ઘરમાં શિફ્ટ થઈ છે.

કપલે નવા ઘરમાં દિવાળી ઉજવી હતી. તેણે સોશિયલ મીડિયા પર સેલિબ્રેશનની તસવીરો પણ શેર કરી હતી. પ્રિયંકા ચોપરા અને નિક જોનસે ડિસેમ્બર, ૨૦૧૮માં ખ્રિસ્તી અને હિંદુ એમ બે વિધિથી લગ્ન કર્યા હતા. તેમના લગ્ન રાજસ્થાનના જોધપુરમાં આવેલા ઉમૈદ ભવનમાં યોજાયા હતા. આવતા મહિને કપલ ત્રીજી વેડિંગ એનિવર્સરી ઉજવશે.

વર્ક ફ્રંટની વાત કરીએ તો, પ્રિયંકા ચોપરા ખૂબ જલ્દી 'મેટ્રિક્સ'માં જોવા મળશે. ફરહાન અખ્તર સાથે 'ધ સ્કાય ઈઝ પિંક'માં કામ કર્યા બાદ એક્ટ્રેસ બોલિવુડથી દૂર હતી પરંતુ તે હવે આગામી સમયમાં કેટરીના કૈફ અને આલિયા ભટ્ટ સાથે 'જી લે ઝરા'નું શૂટિંગ શરૂ કરવાની છે.