Gujarati News

નવી દિલ્હી : ક્રેડિટ રેટિંગ એજન્સી ICRAએ જણાવ્યું હતું કે ચાલુ નાણાકીય વર્ષમાં સ્થાનિક ટુ-વ્હીલરના વેચાણમાં વાર્ષિક ધોરણે 1-4 ટકાનો ઘટાડો થઈ શકે છે. રેટિંગ એજન્સીએ કહ્યું કે આ ઘટાડો ટુ-વ્હીલરની કિંમતોમાં સતત વધારો, પેટ્રોલ મોંઘુ થવા તેમજ અન્ય કારણોને લીધે થશે. ICRAએ જણાવ્યું હતું કે તહેવારોની સિઝનના નબળા પ્રદર્શને ઓછી આવક ધરાવતી વસ્તીની ખરીદ શક્તિ વિશે ચેતવણીઓને પણ ઉજાગર કરી છે.

ICRA રેટિંગ્સે તહેવારોની સિઝનમાં નબળા પ્રદર્શનને પગલે નાણાકીય વર્ષ 2021-22માં વોલ્યુમના આધારે સ્થાનિક ટુ-વ્હીલરના વેચાણમાં 1-4 ટકાનો ઘટાડો થવાનું અનુમાન લગાવ્યુ છે. નાણાકીય વર્ષ 2021-22ના એપ્રિલ-ઓક્ટોબરના સમયગાળામાં સ્થાનિક ટુ-વ્હીલરનું વેચાણ 80.5 લાખ યુનિટ હતું, જે ગયા વર્ષના સમાન સમયગાળામાં લગભગ સમાન હતું. રેટિંગ એજન્સીએ જણાવ્યું હતું કે લોન રિપેમેન્ટમાં ડિફોલ્ટને કારણે ફાઇનાન્સર્સ પણ સાવધ છે.

પ્રીમિયમ સેગમેન્ટની બાઇક પર ઓછી અસર

ટુ વ્હીલર્સમાં પ્રીમિયમ બાઇકની માંગ તેના કરતા સારી છે. ટુ વ્હીલર માર્કેટમાં તેનો બજાર હિસ્સો 15 ટકાની નજીક છે. ઈકરાના રિપોર્ટમાં કહેવામાં આવ્યું છે કે ચિપ શોર્ટેજના કારણે ઓટો સેક્ટરને ભારે નુકસાન ઉઠાવવું પડ્યુ છે.

એન્ટ્રી લેવલની બાઇકનો સૌથી વધુ બજાર હિસ્સો

એન્ટ્રી સેગમેન્ટની બાઇક (75-110cc) એ ભારતમાં ટુ વ્હીલર માર્કેટમાં સૌથી મોટો ફાળો આપે છે. કોરોનાના બીજી લહેરને કારણે આ સેગમેન્ટ પર પણ ખરાબ અસર પડી છે. નોકરી ગુમાવવી, આવક ગુમાવવી, પગારમાં કાપ અને કોઈ ઈન્ક્રિમેન્ટ નહીં, તબીબી ખર્ચમાં વધારો અને બાઇકની કિંમતમાં વધારાને કારણે તેના વેચાણ પર ખરાબ અસર પડી છે.

ઓટોમોબાઈલ સેક્ટરના વેચાણના સંદર્ભમાં આ વર્ષની તહેવારોની સીઝન છેલ્લા એક દાયકામાં સૌથી ખરાબ રહી છે. વાહન ડીલરોની સંસ્થા ફેડરેશન ઓફ ઓટોમોબાઈલ ડીલર્સ એસોસિયેશન (FADA)નું કહેવું છે. નવરાત્રિથી દિવાળી પછીના 42 દિવસના તહેવારોના સમયગાળા દરમિયાન વેચાણ ખરાબ સ્થિતિમાં રહ્યું છે. આના કારણોમાં કારનો ઓછો પુરવઠો અને ટુ-વ્હીલર્સની ઘટતી માંગનો સમાવેશ થાય છે.

પ્રાદેશિક પરિવહન કાર્યાલય સાથે વાહન નોંધણી, જેને વેચાણ માટે સારું પ્રમાણ કહી શકાય, તેમાં 42-દિવસના સમયગાળા દરમિયાન વાર્ષિક ધોરણે 18 ટકાનો ઘટાડો થયો છે. 2019 ના સમાન સમયગાળાની તુલનામાં, ઘટાડો 21 ટકા રહ્યો છે.