Gujarati News

નવી દિલ્‍હી તા. ૨૨ : કોંગ્રેસ સાંસદ રાહુલ ગાંધીએ કેન્‍દ્ર સરકાર પાસે જાતિ ગણતરી કરાવવાની માંગ કરી છે. રાહુલ ગાંધીએ કહ્યું કે મેં એક નાનકડો પ્રશ્ન પૂછ્‍યો કે જો પીએમ ઓબીસીને લઈને આટલું કામ કરી રહ્યા છે તો ૯૦માંથી માત્ર ૩ સચિવ ઓબીસી કેમ છે? કેબિનેટમાં પીએમ રોજ ઓબીસીની વાત કરે છે, તેઓ કહે છે કે લોકસભામાં અમારું પ્રતિનિધિત્‍વ છે, પરંતુ તેનાથી શું થાય છે. હું એ જાણવા માંગુ છું કે ભારતમાં કેટલા ઓબીસી છે, તે ટકાને અનામત મળવી જોઈએ. લોકસભામાં ભાજપના કોઈપણ સાંસદને પૂછો કે શું તેમાંથી કોઈ દેશ ચલાવવાના નિર્ણયો લે છે? દરેક OBC યુવાનોને સમજવું પડશે કે તેમણે આ દેશ ચલાવવામાં ભાગ લેવો જોઈએ કે નહીં.રાહુલ ગાંધીએ વધુમાં કહ્યું કે, કેન્‍દ્ર સરકારે સીમાંકન કલમને સંપૂર્ણપણે દૂર કરવી જોઈએ અને તેને તાત્‍કાલિક લાગુ કરવી જોઈએ. વડાપ્રધાને તેમના આગામી ભાષણમાં દેશને સમજાવવું પડશે કે ભારતના ૯૦ મુખ્‍ય અધિકારીઓમાંથી માત્ર ૩ જ OBC કેમ છે? શું તમે ભવિષ્‍યમાં સરકારમાં  OBCં અને મહિલાઓ માટે અલગથી અનામતની જોગવાઈ કરવા જઈ રહ્યા છો? અમારે પહેલા એ શોધવાનું છે કે ત્‍યાં કેટલા ઓબીસી છે, પહેલા વસ્‍તી ગણતરી થવી જોઈએ, તમે મને ડેટા આપો, પછી હું તમારા પ્રશ્નનો જવાબ આપીશ. અમે પરિવર્તન ઈચ્‍છીએ છીએ.કોંગ્રેસના સાંસદ રાહુલ ગાંધીએ કહ્યું કે જયારે મેં આ આંકડો જોયો કે ૯૦માંથી ૩ ઓબીસી છે તો મને આશ્ચર્ય થયું. અમે આજે એક બિલ પસાર કરી રહ્યા છીએ અને ૧૦ વર્ષ પછી તેનો અમલ કરીશું, આનો અર્થ શું છે? ભારતીય મહિલાઓને એટલી ઓછી બુદ્ધિશાળી ન ગણો. અફસોસની વાત એ છે કે આપણે આપણા સમયમાં OBC ક્‍વોટા આપવો જોઈતો હતો.

રાહુલ ગાંધીએ કહ્યું કે થોડા દિવસ પહેલા સંસદના વિશેષ સત્રની જાહેરાત કરવામાં આવી હતી અને જૂની ઇમારતમાંથી નવી ઇમારતમાં શિફટ થવું સારી બાબત હતી. અગાઉ ખબર ન હતી કે સમસ્‍યા શું છે? ત્‍યારે મને ખબર પડી કે મહિલા અનામત બિલ છે. સાચી વાત તો એ છે કે આજે મહિલા અનામતનો અમલ થઈ શકે છે. ૩૩% સીટો મહિલાઓને આપી શકાય છે. તે એટલું જટિલ નથી. આ એક ડાયવર્ઝન યુક્‍તિ છે. ઓબીસી અનામતને લઈને ગેરમાર્ગે દોરવાના પ્રયાસો થઈ રહ્યા છે.