Gujarati News

Gujarati News

News of Saturday, 22nd September 2018

વિશ્વ બેંક મધ્યમ વર્ગને ધનવાન બનાવશે : જંગી સહાય આપશે

મહત્વકાંક્ષી પંચવર્ષીય યોજના : મળશે ૨૫થી ૩૦ અબજ ડોલરની સહાયઃ ભારતીય અર્થવ્યવસ્થા પાંચ - સાત વર્ષમાં થશે ૫૦૦૦ અબજ ડોલરની

વોશિંગટન તા. ૨૨ : વિશ્વ બેંકે ભારત માટે એક મહત્વકાંક્ષી પંચવર્ષીય 'સ્થાનીક ભાગીદારી વ્યવસ્થા' (સીપીએફ)ને મંજૂરી આપી છે. જેની હેઠળ ભારતને ૨૫થી ૩૦ અબજ ડોલરની નાણાંકીય સહાયતા મળવાની આશા છે. જેથી દેશને ઓછી આવકવાળા દેશોની શ્રેણીમાંથી ઉચ્ચ આવક ધરાવતા દેશની શ્રેણીમાં પહોંચવા મદદ મળી શકે. વિશ્વ બેંકે વડાપ્રધાન નરેન્દ્ર મોદીની જાહેરાતના એક દિવસ પછી આ ભાગીદારી વ્યવસ્થાને મંજૂરી મળી છે કે ભારતીય અર્થવ્યવસ્થા પાંચ-સાત વર્ષમાં ૫,૦૦૦ અબજ ડોલર થઈ જશે.

વર્લ્ડ બેંકનું માનવું છે કે સીપીએફ યોજનાથી ભારતને પોતાના સ્વસ્થ આર્થિક વૃદ્ઘિના લક્ષ્ય મેળવવામાં મદદ મળશે. વિશ્વ બેંકના બોર્ડ ઓફ ડિરેકટર્સે ભારતના એક ઉચ્ચ મધ્યમ આવક ધરાવતો દેશ બનવાના લક્ષ્યનું સમર્થન કર્યું છે. આ સહાયતાથી દેશની મૂળ વિકાસની પ્રાથમિકતાઓની કેટલીક મુશ્કેલીઓ ઉકેલવામાં મદદ મળશે. જેમાં રિસોર્સિસનો ઉપયોગ અને વિકાસ તેમજ રોજગાર સર્જન અને હ્યુમન કેપિટલ જેવી પ્રાથમિકતાઓનો સમાવેશ થાય છે.

આ ભાગીદારી વ્યવસ્થા હેઠળ ભારતને આંતરરાષ્ટ્રીય પુનઃનિર્માણ અને વિકાસ બેંક (આઈબીઆરડી), ઈન્ટરનેશનલ ફાઈનાન્સ કોર્પોરેશન (IFC) અને મલ્ટીલેટરલ ઈન્વેસ્ટમેન્ટ ગેરંટી એજન્સી (એમઆઈજીએ) પાંચ વર્ષમાં ૨૫થી ૩૦ અબજ ડોલરની આર્થીક મદદ મળવાની આશા છે. વર્લ્ડ બેંકના વાઈસ પ્રેસિડન્ટ અને દક્ષિણ એશિયાના ઈનચાર્જ હાર્ટવિંગ શ્કાફરે કહ્યું કે, 'ઝડપથી વધતી અર્થવ્યવસ્થા, વૈશ્વિક કદ અને પાછલા દશકમાં સૌથી વધારે સંખ્યામાં લોકોને ગરીબી રેખાથી ઉપર લાવવાના વિશેષ અનુભવના લીધે ભારત ૨૦૩૦ સુધી એક ઉચ્ચ મધ્યમ આવકવાળો દેશ બનવાની સારી સ્થિતિમાં છે.'

વિશ્વ બેંકના ભારતના ડિરેકટર જુનૈદ અહમદે કહ્યું કે, 'આ પંચવર્ષીય યોજના છે. જે ભારત વિશે બેંકના કમિટમેન્ટનું સબૂત છે. આ વ્યવસ્થા એ વાતથી જોડાયેલી છે કે અમે શું કરશું? કેવી રીતે કરશું? અને ફાઈનાન્શિયલ સ્તર શું હશે? આ રીતે ભાગીદારીની વ્યવસ્થા છે. જે ભારત સાથે બનાવવામાં આવી છે.' અહમદે કહ્યું છે કે સીપીએફમાં પ્રક્રિયાબદ્ઘ રીતે દેશની સમસ્યાઓની ઓળખ કરવામાં આવશે. જે દેશ વિશે એક પ્રસ્તાવના રજૂ કરશે.

વિશ્વ બેંકના ભારત માટે સીપીએફ રજૂ કર્યા પછી અહમદે કહ્યું કે બેંક ગત દશકમાં ભારત દ્વારા કરાયેલી આર્થિક પ્રગતિ અને વિકાસને માન્યતા આપે છે. તેમણે કહ્યું કે બેંક જાણે છે કે ભારતે એક ઓછી આવક ધરાવતા દેશમાંથી મધ્યમ આવકવાળા દેશના રુપમાં પહોંચ્યો છે હવે દેશ મધ્યમ આવકમાંથી ઉચ્ચ મધ્યમવાળા આર્થિક બદલાવમાં પ્રવેશ કરી રહ્યો છે. આ સીપીએફ આ ટાર્ગેટમાં બેંકની મદદ વિશે જણાવે છે.(૨૧.૨)

(11:48 am IST)