Gujarati News

બેલાગાવી તા. ૨૧ : કર્ણાટકના બેલાગાવી જિલ્લામાં દોસ્‍તની ચેલેન્‍જ પર એક ૬૫ વર્ષીય શખસે કૃષ્‍ણા નદીમાં ૩.૫ કીમી સ્‍વિમિંગ કર્યું. જણાવાઈ રહ્યું છે કે, બેલાગાવીના રોલી ગામના રહેવાસી શિવાનંદ એનને તેમના ગામના મિત્ર ગોવિંદાપ્‍પાએ કૃષ્‍ણા નદીમાં તરવાની ચેલેન્‍જ આપી હતી. ગોવિંદાપ્‍પાએ શરત મૂકી કે, જો શિવાનંદ નદીમાં ૩.૫ કિમી સુધી તરી લે તો ગોવિંદપ્‍પા તેમને આ સાહસિક કામ માટે ઈનામ તરીકે ૨૦ ગ્રામ સોનાની અંગૂઠી આપશે.

ગોવિંદાપ્‍પાના આ ચેલેન્‍જનો સ્‍વીકાર કરતા શિવાનંદે બુધવારે આ કામ કરવાનું નક્કી કર્યું. નક્કી કાર્યક્રમ પ્રમાણે શિવાનંદ અન્‍ય ગ્રામીણો સાથે કૃષ્‍ણા નદીના તટ પર પહોંચ્‍યા અને સવારે ૯ અન્‍ય સ્‍પર્ધકો સાથે સ્‍પર્ધા શરૂ થઈ. આમાં ૫૫ વર્ષના મહાદેવપ્‍પા મુનાગોલીએ સૌથી ઓછા સમયમાં ૩.૫ કીમીનું અંતર કાપી રેસ જીતી લીધી. શિવાનંદ પણ ચેલેન્‍જ પ્રમાણે ૩.૫ કીમી તરીને નદીની બહાર નીકળ્‍યા અને ગામના લોકોએ તેમની પ્રશંસા કરી.

ચેલેન્‍જ અનુસાર, ગોવિંદપ્‍પાએ શિવાનંદને ૨૦ ગ્રામની અંગૂઠી આપી અને તેમની હિંમતની પ્રશંસા કરી. શિવાનંદે મીડિયા સાથે વાત કરતા કહ્યું કે, તે છેલ્લા ૨૦ વર્ષથી સ્‍વિમિંગની પ્રેક્‍ટિસ કરતા નથી. તેમણે કહ્યું કે, તેમને બાળકથી જ સ્‍વિમિંગનો ઘણો શોખ હતો, જેના કારણે તેઓ આ ચેલેન્‍જ સ્‍વીકારી શક્‍યા અને ચેલેન્‍જ પૂરી કર્યા બાદ પણ તેમને થાક ન લાગ્‍યો.