Gujarati News

Gujarati News

News of Tuesday, 21st March 2023

નાચતા નાચતા પોસ્‍ટ ઓફિસના અધિકારીને આવ્‍યો હાર્ટએટેક : મોત

કોરોના બાદ લોકોમાં હાર્ટએટેકનું પ્રમાણ વધ્‍યુ છે અને આ આખા દેશમાં ચિંતાનો વિષય છે

ભોપાલ તા. ૨૧ : મધ્‍યપ્રદેશના પાટનગર ભોપાલમાંથી એકમાંથી એક વીડિયો વાયરલ થયો છે. પોસ્‍ટ વિભાગના અધિકારીનુ ડાંસ ફલોર જ મૃત્‍યુ થઈ ગયુ હતુ. એક પ્રસંગ દરમિયાન પોસ્‍ટના અધિકારી ‘બસ આજથી રાત કે જિંદગી, કલ હમ કહા, તુમ કહા....' ગીત પર સાથિદારો સાથે નાચી રહ્યા હતા ત્‍યારે તેમને હાર્ટએટેક આવ્‍યો હતો. હાર્ટએટેક આવ્‍યા બાદ તે જમીન પર પડી ગયા હતા. જમીન પર પડ્‍યા બાદ તેઓ ઉભા થઈ શક્‍યા ન હતા. સમગ્ર ઘટનાનો વીડિયો હાલ સામે આવ્‍યો છે.

મૃતક સુરેન્‍દ્રકુમાર દીક્ષિત પોસ્‍ટ વિભાગમાં અસિસ્‍ટેંટ ડિરેક્‍ટર હતા. વીડિયો ચાર દિવસ પહેલાનો છે. જાણકારી મુજબ, પોસ્‍ટ વિભાગ દ્વારા ૩૪મું પોસ્‍ટ નેશનલ હોકી ટૂર્નામેન્‍ટનું આયોજન કરવામાં આવ્‍યું હતુ. આ આયોજન ૧૩થી ૧૭ માર્ચ સુધી કરવામાં આવ્‍યું હતું. ૧૬ માર્ચના દિવસે પોસ્‍ટ વિભાગના કેમ્‍પસમાં સાંસ્‍કૃતિક કાર્યક્રમનું આયોજન કરવામાં આવ્‍યુ હતુ. આ કાર્યક્રમમાં પોસ્‍ટ વિભાગના અધિકારીઓ અને કર્મચારીઓ સામેલ થયા હતા. સાંસ્‍કૃતિક કાર્યક્રમમાં અધિકારીઓ અને કર્મચારીઓ ડાન્‍સ કરી રહ્યા હતા ત્‍યારે આ દરમિયાન સુરેન્‍દ્રકુમારને હાર્ટએટેક આવ્‍યો હતો.

વીડિયોમાં જોવા મળી રહ્યુ છે કે, ડાંસ કરતી વખતે સુરેન્‍દ્રકુમાર એકદમ સ્‍વસ્‍થ દેખાઈ રહ્યા હતા. આ દરમિયાન તેમને હાર્ટ એટેક આવ્‍યો હતો. એટેક આવ્‍યા બાદ તેઓ નીચે પડી ગયા હતા. અચાનક નીચે પડી જવાને કારણે લોકોભેગા થઈ ગયા હતા. સારવાર માટે સુરેન્‍દ્રકુમારને તાત્‍કાલિક હોસ્‍પિટલ લઈ જવામાં આવ્‍યા હતા. જયા ચેકઅપ બાદ તેમને મૃત ઘોષિત કરવામાં આવ્‍યા હતા. ૧૭ માર્ચના દિવસે તેમના અંતિમ સંસ્‍કાર કરવામાં આવ્‍યા હતા.

રાજકોટમાં પણ એક યુવક કુદરતી હાજતે ગયો હતો ત્‍યારે તેને પણ અચાનક હાર્ટએટેક આવ્‍યો હતો. ઘરના સભ્‍યો જયારે જયારે યુવકને હોસ્‍પિટલ લઈ ગયા હતા ત્‍યારે ડોક્‍ટરે તેને મૃત ઘોષિત કર્યો હતો. ગુજરાતમાં છેલ્લા ઘણા સમયથી યુવકોમાં હાર્ટએટેકના પ્રમાણમાં વધારો થઈ રહ્યો છે.

(10:35 am IST)