Gujarati News

નવી દિલ્હી : કેન્દ્રની મોદી સરકારે પાકિસ્તાનનાં વિરોધની અવગણના કરતા જમ્મુ-કાશ્મીરનાં કિશ્તવાડ જિલ્લામાં ચિનાબ નદી પર સ્થિત 850 મેગાવોટની રતલે હાઈડ્રોઇલેક્ટ્રિક પ્રોજેક્ટ માટે 5281.94 કરોડનાં રોકાણનાં પ્રસ્તાવને મંજૂરી આપી હતી. પાકિસ્તાન ભારતનાં આ પ્રોજેક્ટનો વિરોધ કરી રહ્યું છે. તત્કાલીન વડા પ્રધાન મનમોહનસિંહે 25 જૂન 2013 નાં રોજ આ પ્રોજેક્ટનો શિલાન્યાસ કર્યો હતો. જો કે, પાકિસ્તાન સરકારે ડેમનાં બાંધકામ સામે વાંધો ઉઠાવતા કહ્યું હતું કે તે સિંધુ જળ સંધિને અનુરૂપ નથી. પાકિસ્તાને પણ આ પ્રોજેક્ટનો વિરોધ કરવા માટે વર્લ્ડ બેંકનો સંપર્ક કર્યો હતો. જો કે, પાકિસ્તાનનાં વિરોધ છતાં આખરે ભારતે આ પ્રોજેક્ટને મંજૂરી આપી દીધી હતી.

   નોંધપાત્ર વાત એ છે કે, ઓગસ્ટ 2017 માં, વિશ્વ બેંકે ભારતને ડેમ બનાવવાની મંજૂરી આપી અને પછીનાં વર્ષે એટલે કે 2018 માં, રાજ્ય સરકારે બાંધકામ શરૂ કરવાના પ્રસ્તાવ સાથે કેન્દ્રનો સંપર્ક કર્યો. રાષ્ટ્રીય હાઇડ્રોઇલેક્ટ્રિક કોર્પોરેશન અને જમ્મુ-કાશ્મીર રાજ્ય વીજ વિકાસ નિગમ લિમિટેડની નવી સંયુક્ત સાહસ કંપની (જેવીસી) અનુક્રમે 51 અને 49 ટકા આ રોકાણ કરશે. જમ્મુ કાશ્મીરનાં નાયબ રાજ્યપાલ મનોજ સિંહાએ કહ્યું કે, વડા પ્રધાન નરેન્દ્ર મોદીની અધ્યક્ષતાવાળી કેન્દ્રીય કેબિનેટે જમ્મુ-કાશ્મીરનાં કેન્દ્ર શાસિત પ્રદેશોનાં આ પ્રોજેક્ટને લગતી આ દરખાસ્તને મંજૂરી આપી દીધી છે. જમ્મુ-કાશ્મીરનાં કેન્દ્ર શાસિત ક્ષેત્રને સરકાર રતલે એચઈ પ્રોજેક્ટ (850 મેગાવોટ) નાં નિર્માણ માટે રચાયેલી સંયુક્ત સાહસ કંપનીમાં જેકેએસપીડીસીનાં શેર મૂડી ફાળો માટે રૂ. 776..44 કરોડની ગ્રાન્ટ સાથે જરૂરી સહાય પણ કરી રહી છે.