Gujarati News

Gujarati News

News of Tuesday, 20th August 2019

જન્માષ્ટમીનો ક્રેજ

અમદાવાદ-ગોવાની ફલાઇટના ભાડા આસમાને :સીધી ફલાઇટનું ભાડું રૂ.૩૮,૨૦૦

અમદાવાદ,તા.૨૦:જન્માષ્ટમીના તહેવારના આડે હવે માત્ર ત્રણ દિવસની વાર છે ત્યારે ગુજરાતના જુગારીઓ માટે પસંદગીના સ્થળના ચાર્ટમાં ગોવા ટોપ પર છે. ૨૪ અને ૨૫ ઓગસ્ટના રોજ પડી રહેલા બે દિવસના વેકેશન માટે અમદાવાદ-ગોવા-અમદાવાદ ફ્લાઈટની ટિકિટની માગ એટલી વધી ગઈ છે કે તેના ભાવમાં ૮૦ ટકા જેટલો અધધ.. વધારો થયો છે.

 

જુગાર રમનારાઓ માટે હોંગકોંગ પણ તેમનું ફેવરિટ ડેસ્ટિનેશન છે, પરંતુ ત્યાં હાલ રાજકીય અશાંતિ પ્રવર્તી રહી હોવાના કારણે લોકો ગોવા જવાનું વધારે પસંદ કરી રહ્યા છે. પ્રવાસીઓ આ વખતે ગોવા માટે હોંગકોંગ જવાનું છોડી રહ્યા છે તેમ ટૂર ઓપરેટર્સે કહ્યું.

આ વીકએન્ડમાં અમદાવાદ અને ગોવાની રિટર્ન ફ્લાઈટની એક ટિકિટનો મેકિસમમ ભાવ ૧૪,૪૦૦ રૂપિયા છે. જયારે સામાન્ય દિવસોમાં તેની ટિકિટ ૮ હજાર રૂપિયા હોય છે તેમ ટૂર ઓપરેટર્સે કહ્યું. આ જ ક્ષેત્ર માટે સીધી ફ્લાઈટનું મેકિસમમ ભાડું ૩૪,૨૦૦ રૂપિયા છે, જે સ્પષ્ટ રીકે સામાન્ય ભાવથી ચારગણું વધારે છે.

'હોંગકોંગમાં હાલ રાજકીય અશાંતિ હોવાથી મોટાભાગના પ્રવાસીઓએ હોંગકોગ અને મકાઉ જવાનું ટાળ્યું છે અને તેમાનાં જ પ્રવાસીઓ ગોવા તરફ વળ્યા છે. જન્માષ્ટમીના આડે માત્ર બે-ત્રણ દિવસ જ બાકી છે ત્યારે ઈન્ટરનેશનલ ફ્લાઈટ કરતાં ડોમેસ્ટિક ફ્લાઈટનું બુકિંગ વધારે થઈ રહ્યું છે'તેમ ટ્રાવેલ એજન્ટ એન્ડ ટૂર ઓપરેટર્સ અસોસિએશન ઓફ ગુજરાત (TAG)ના પ્રમુખ પંકજ ગુપ્તાએ કહ્યું.

ગુજરાતમાંથી ગોવા જતાં સૌથી વધારે પ્રવાસીઓ સૌરાષ્ટ્રના છે. વધારે માગ અને લિમિટેડ સપ્લાયના કારણે, ફ્લાઈટના ભાડામાં જબદરસ્ત રીતે વધારો થાય છે.

'જન્માષ્ટમી પર જુગાર રમવો તે છેલ્લા દ્યણા વર્ષોથી ચાલી આવતી પરંપરા છે, કાયદા સાથે બાથ ભીડવી અને મુશ્કેલીઓને સામેથી આમંત્રણ આપવા કરતાં લોકો ગોવા જઈ રહ્યા છે, જયાં કસિનો ક્રૂઝ વધારે છે'તેમ ટ્રાવેલ એજન્ટ્સલૃફેડરેશન ઓફ ઈન્ડિયા (TAFI)-ગુજરાત ચેપ્ટરના સેક્રેટરી મનિષ શર્માએ કહ્યું.

ગુજરાતની નજીક આવેલા સ્થળો જેમ કે ઉદયપુર, કુંભલગઢ, જયપુર, દિવ-દમણ અને સાપુતારા પણ આ વીકએન્ડમાં પ્રવાસીઓ માટેના ફેવરિટ ડેસ્ટિનેશન છે.

પૂરની સ્થિતિના કારણે મહારાષ્ટ્રના અન્ય સ્થળોને આ વખતે પસંદ કરવામાં આવી રહ્યા નથી, તેમ ટૂર ઓપરેટર્સ જણાવ્યુ હતું.(૨૨.૫)

(12:17 pm IST)