Gujarati News

નવી દિલ્હી,તા.૨૦ : કુંભમેળા દરમિયાન કથિત બનાવટી કોવિડ પરીક્ષણનો મામલો સામે આવ્યા બાદ, બે ખાનગી લેબ્સ-નલવા લેબોરેટરીઝ પ્રાલિ, હિસાર અને ડો. લાલચંદાની લેબ વિરુદ્ધ કેસ નોંધવામાં આવ્યો છે. આ કેસમાં હવે બીજી કેટલીક લેબનું નામ પણ સામે આવી રહ્યું છે. આવા ઘણા લોકોને કોરોનાનો રિપોર્ટ મળ્યો છે જેમણે ટેસ્ટ પણ કરાવ્યા નથી. હવે આ સમગ્ર મામલાની તપાસ ચાલી રહી છે. ચેન્નઈના રહેવાસી રણજીત કુમારને ગુરુગ્રામની એક લેબમાંથી તેમના મોબાઈલ પર ૫ મેસેજ મળ્યા હતા. જે મેસેજ મોકલવામાં આવ્યા હતા તેમાં નામ અલગ હતા અને દરેકનો રિપોર્ટ નેગેટિવ હતો. રણજિત કુમારે કહ્યું કે એક સાથે કોવિડના ઘણા બધા મેસેજ મળ્યા બાદ તેઓ ચોંકી ગયા હતા. રણજીત કુમારે કહ્યું કે મેસેજ પર મળેલી લિંક્સ પર ક્લિક કર્યા પછી કોરોનાનો રિપોર્ટ નેગેટિવ હતો. જ્યારે મેં મેસેજના સોર્સને જાણવાનો પ્રયત્ન કર્યો, ત્યારે જાણવા મળ્યું કે બધા સેમ્પલ્સ હરિદ્વારથી એકત્રિત કરવામાં આવ્યા છે. આઇટી કંપનીમાં કામ કરવાને કારણે રણજીત સમજી ગયો કે ક્યાંક ને ક્યાંક કોઈ ગડબડ છે.

        નામ ન જાહેર કરવાની શરતે હરિદ્વારના એક પ્રોફેસરે જણાવ્યું કે, તેમને પણ આરટી-પીસીઆર રિપોર્ટ મળ્યો છે જો કે, તેઓએ ટેસ્ટ પણ કરાવ્યો નથી. દિલ્હીથી કુંભને કવર કરવા માટે દિલ્હી ગયેલા એક પત્રકાર જેમણે પહેલાથી જ પરીક્ષણ કરાવ્યું હતું તેમને પણ ફોન પર એક મેસેજ મળ્યો. આ અંગે તેમણે હરિદ્વારના સીએમઓ પાસે ફરિયાદ પણ નોંધાવી હતી. કુંભ મેળા દરમિયાન કથિત બનાવટી કોવિડ પરીક્ષણો માટે વિપક્ષો દ્વારા હુમલો કરાઈ રહેલી ઉત્તરાખંડ સરકારે આરોપી કંપની મેક્સ કોર્પોરેટ સર્વિસ અને બે ખાનગી લેબ વિરુદ્ધ કેસ દાખલ કર્યો છે. પોલીસ મહાનિર્દેશક અશોક કુમારે જણાવ્યું હતું કે હરિદ્વારના મુખ્ય મેડિકલ ઓફિસર શંભુ કુમાર ઝા વતી મેક્સ કોર્પોરેટ સર્વિસ અને બે ખાનગી લેબ્સ-નલવા લેબોરેટરીઝ પ્રા.લિ., હિસાર અને ડો. લાલચંદાની લેબ મધ્ય દિલ્હી સામે કેસ નોંધવામાં આવ્યો છે.