Gujarati News

Gujarati News

News of Tuesday, 20th April 2021

દિલ્હીએ તોડ્યો મુંબઈ સામે હારનો સિલસિલો : છ વિકેટે મુંબઈ ઇન્ડિયન સામે જીત : શિખર ધવને 45 રન ફટકાર્યા

137 રનનો લક્ષ્યાંક દિલ્હી કેપિટલ્સે 19.1 ઓવરમાં 4 વિકેટ ગુમાવી હાંસલ કર્યો : દિલ્હીની ટૂર્નામેન્ટમાં ત્રીજી જીત

ચેન્નાઇ : આખરે દિલ્હી કેપિટલ્સએ મુંબઈ ઈન્ડિયન્સને હરાવ્યું છે,ઈન્ડિયન પ્રીમિયર લીગની 13મી મેચમાં રિષભ પંતની આગેવાનીમાં દિલ્હીએ મુંબઈને 6 વિકેટે પરાજય આપી ચેપોકમાં શાનદાર વિજય મેળવ્યો છે. મહત્વનું છે કે પાછલી સીઝનમાં મુંબઈ અને દિલ્હી વચ્ચે ચાર વખત ટક્કર થઈ હતી જેમાં ચારેય વખત મુંબઈની ટીમને જીત મળી હતી. ટોસ જીતીને પ્રથમ બેટિંગ કરતા મુંબઈ ઈન્ડિયન્સે 20 ઓવરમાં 9 વિકેટે 137 રન બનાવ્યા હતા. જેના જવાબમાં દિલ્હી કેપિટલ્સે 19.1 ઓવરમાં 4 વિકેટ ગુમાવી લક્ષ્ય હાસિલ કરી લીધો છે. દિલ્હીની આ ટૂર્નામેન્ટમાં ત્રીજી જીત છે. 

મુંબઈએ આપેલા 138 રનના લક્ષ્યનો પીછો કરવા ઉતરેલી દિલ્હી કેપિટલ્સની શરૂઆત ખરાબ રહી હતી. ઈનિંગની બીજી ઓવરમાં પૃથ્વી શો (7) રન બનાવી જયંત યાદવનો શિકાર બન્યો હતો. ટીમે પાવરપ્લેમાં 1 વિકેટે 39 રન બનાવ્યા હતા. શિખર ધવન અને સ્ટીવ સ્મિથે મળીને બીજી વિકેટ માટે 53 રનની ભાગીદારી કરી હતી. ટીમનો સ્કોર 64 રન હતો ત્યારે સ્ટીવ સ્મિથ (33) રન બનાવી પોલાર્ડનો શિકાર બન્યો હતો. સ્મિથે 29 બોલમાં 4 ચોગ્ગા ફટકાર્યા હતા.

ત્યારબાદ લલિલ યાદવ ક્રિઝ પર આવ્યો હતો. તેણે ધવન સાથે મળી ટીમનો સ્કોર 100 પર પહોંચાડ્યો હતો. શિખર ધવન 42 બોલમાં 5 ચોગ્ગા અને 1 છગ્ગા સાથે 45 રન બનાવી રાહુલ ચાહરનો શિકાર બન્યો હતો. જસપ્રીત બુમરાહે રિષભ પંત (7)ને આઉટ કરી મુંબઈને ચોથી સફળતા અપાવી હતી. શિમરોન હેટમાયરે અણનમ 14 અને લલિત યાદવ 22 રન બનાવી અણનમ રહ્યો હતો.

ટોસ જીતીને પ્રથમ બેટિંગ કરવા ઉતરેલી મુંબઈની ટીમને પ્રથમ ઝટકો ક્વિન્ટન ડિ કોકના રૂપમાં લાગ્યો, જે 4 બોલમાં 1 રન બનાવી માર્કસ સ્ટોયનિસની ઓવરમાં રિષભ પંતના હાથે કેચઆઉટ થયો હતો. બીજી સફલતા દિલ્હીને સૂર્યકુમાર યાદવના રૂપમાં મળી, જે 15 બોલમાં 24 રન બનાવી આવેશ ખાનની ઓવરમાં આઉટ થયો હતો. રોહિત શર્મા ત્રીજી વિકેટના રૂપમાં આઉટ થયો હતો. રોહિત 30 બોલમાં 3 ચોગ્ગા અને 3 છગ્ગા સાથે 44 રન બનાવી અમિત મિશ્રાનો શિકાર બન્યો હતો

(11:51 pm IST)
  • કેન્દ્રીય આરોગ્યમંત્રી ડો. હર્ષવર્ધનની જાહેરાત : COVID19 પ્રધાનમંત્રી ગરીબ કલ્યાણ પેકેજ (PMGKP) હેઠળની વીમા યોજના, આરોગ્ય સેવા આપતા કર્મચારીઓ માટે આજથી વધુ 1 વર્ષ માટે લંબાવવામાં આવી છે. access_time 11:31 pm IST

  • તેલંગણાના મુખ્યમંત્રીને કોરોના વળગ્યો : તેલંગણાના મુખ્યમંત્રી કે. ચંદ્રશેખર રાવને કોરોના પોઝિટિવ આવતા હાલમાં આઇસોલેશનમાં ડૉક્ટરોની નજર હેઠળ, પોતાના ફાર્મહાઉસમાં સારવાર લઈ રહ્યા છે. access_time 9:57 pm IST

  • દેશના ૧૦ રાજ્યોમાં ૧૦ હજારથી માંડીને ૫૮ હજાર નવા કોરોના કેસ નોંધાયા: મહારાષ્ટ્રમાં ૨૪ કલાકમાં સૌથી વધુ ૫૮ હજાર કેસ: યુપીમાં ૨૮,૦૦૦: દિલ્હીમાં ૨૩ હજાર: કર્ણાટકમાં ૧૫૦૦૦ તેમાંથી એકલા બેંગ્લોરમાં ૯,૬૦૦ કેસ: એમપીમાં બાર હજાર: રાજસ્થાન ૧૧૦૦૦: ગુજરાત ૧૧ હજાર અને તામિલનાડુ દસ હજાર નવા કેસો: મહારાષ્ટ્રના પુણેમાં ૯૫૦૦: મુંબઈમાં ૭૩૦૦: નાગપુર ૬૭૦૦ નવા કોરોના કેસ: જ્યારે સૌરાષ્ટ્ર-ગુજરાતના અમદાવાદમાં ૪૨૦૭, સુરતમાં ૧૮૭૯, રાજકોટમાં ૬૬૩, ચૌધરી હાઇસ્કૂલના મેદાનમાં ૧૦૦ મોટરની લાઈનો લાગી છે અને વડોદરા ૪૨૬ નવા કોરોના કેસ નોંધાયા access_time 12:06 pm IST