Gujarati News

નવીદિલ્હીઃ શામળાજી પોલીસ અને એસઓજી પોલીસે અણસોલ ગામની સીમમાંથી બાતમીના આધારે કાશ્મીરથી વાયા રાજસ્થાન થઈ ગુજરાતમાં એસએકસ-૪ કારમાં ગુપ્ત ખાના બનાવી સંતાડીને લવાતો ૨૪.૧૯૦ કી.ગ્રામનો ૧.૨૦ કરોડ રૂપિયાનો કાશ્મીરી ચરસનો જથ્થો ઝડપી પાડી ૨ કેરિયર શખ્શોની ધરપકડ કરી કાયદેસરની કાર્યવાહી હાથધરી હતી.

 અંગેની વિગત મુજબ શામળાજી પોલીસ અને એસઓજી પોલીસની ટીમે બાતમીના આધારે રતનપુર ચેકપોસ્ટ નજીક ઠેર ઠેર નાકાબંધી અને પેટ્રોલિંગ હાથધરી રાજસ્થાન તરફથી આવતા વાહનોનું સઘન ચેકીંગ હાથધરી બાતમી આધારિત ગોલ્ડન કલરની એસએકસ-૪ કાર (ગાડી.નં.DL7CH9483) કારને અટકાવી તલાસી લેતા કારના પડખામાં ગુપ્ત ખાના બનાવી પ્લાસ્ટિકની બેગમાં સંતાડેલ કાશ્મીરી ચરસના-૨૪ પેકેટ મળી આવ્યા હતા જેનો કુલ વજન ૨૪.૧૯૦ કી.ગ્રામ કીં.રૂ.૧૨૦૯૫૦૦૦ ના જથ્થા સાથે ગુલશન રાધેશ્યામ ચમાર (રહે,અંબાલા, હરિયાણા) અને ગોપાલચંદ્ર સુરતરામ કોલી (રહે, કુલ્લુ,  હિમાચલ પ્રદેશ) ની ધરપકડ કરી કારની કીં.રૂ.૨૦૦૦૦૦ તથા મોબાઈલ નંગ-૩ કીં.રૂ.૨૫૦૦,આરોપીઓ પાસેથી મળી આવેલ રોકડ રકમ-૩૮૦૦૦ મળી કુલ રૂ.૧૨૩૩૫૫૦૦ નો મુદ્દામાલ જપ્ત કરી કાશ્મીરી ચરસ ભરી આપનાર ગુલામનબી ગુલામરસુલ, અને ગુલામરસુલ (બંને રહે,અનંતનાગ, જમ્મુ) વિરૂદ્ઘ ધી નાર્કોટિકસ ડ્રગ્સ એન્ડ સાયકોટ્રોફિક સબસ્ટન્સીસ એકટ મુજબ ગુન્હો નોંધી ઝડપાયેલા બંને શખ્શોને જેલના સળિયા પાછળ ધકેલી દઈ કાશ્મીરી ચરસ ભરી આપનાર શખ્શોને ઝડપી પાડવા ચક્રો ગતિમાન કર્યા હતા.

શામળાજી પોલીસ અને એસઓજીની સંયુકત ઓપરેશનમાં કારમાંથી ઝડપાયેલ ૧.૨૦ કરોડનો જથ્થો ગુજરાતમાં કોને પહોંચાડવાનો હતો અને ગુજરાતમાં યુવાનોને નશાના રવાડે ચઢાવી નશાનો કાળો કારોબાર ચલાવનાર રેકેટનો પર્દાફાશ કરવા મથામણમાં લાગી હોવાની માહિતી પોલીસ સૂત્રો પાસેથી મળી હતી.