Gujarati News

નવી દિલ્હી : બ્રિક્સ (બ્રાઝિલ, રશિયા, ભારત, ચીન, દક્ષિણ આફ્રિકા) દેશોના વિદેશ મંત્રીઓ ગુરુવારે મળશે. પાંચ દેશોના વિદેશ મંત્રીઓ આગામી મહિનાના અંતમાં યોજાનારી BRICS સમિટ પહેલા વીડિયો લિન્ક દ્વારા મુલાકાત કરશે. ચીનના વિદેશ મંત્રાલયે બુધવારે આ જાણકારી આપી. ચીન દ્વારા આયોજિત થનારી પાંચ મંત્રીઓની બેઠક, યુક્રેન પર રશિયાના સતત આક્રમણ અને કોવિડ-19 મહામારીની વૈશ્વિક અસર અંગે ચર્ચા કરવામાં આવશે.

આ પહેલીવાર હશે જ્યારે ભારતના વિદેશ મંત્રી એસ જયશંકર તેમના ચીનના સમકક્ષ વાંગ યી, રશિયાના સર્ગેઈ લવરોવ, બ્રાઝિલના કાર્લોસ આલ્બર્ટો ફ્રાન્કા અને દક્ષિણ આફ્રિકાના નાલેડી પાંડોરને એક જ મંચ પર મળશે. રશિયાએ આ વર્ષે ફેબ્રુઆરીમાં યુક્રેન સામે યુદ્ધની જાહેરાત કરી હતી.

ચીને રશિયા અને યુક્રેન વચ્ચેના યુદ્ધ માટે યુએસ અને નોર્થ એટલાન્ટિક ટ્રીટી ઓર્ગેનાઈઝેશન (નાટો)ની આક્રમક વિસ્તરણ યોજનાઓને જવાબદાર ઠેરવી છે. આવી સ્થિતિમાં આવતીકાલે યોજાનારી વિદેશ મંત્રીઓની બેઠકમાં રશિયા અને યુક્રેનના મુદ્દા પર સંવેદનશીલ ચર્ચા થઈ શકે છે. બીજી તરફ, ભારત અને ચીન પણ છેલ્લા બે વર્ષથી પૂર્વી લદ્દાખમાં સરહદ વિવાદને લઈને તણાવની સ્થિતિમાં છે. આવી સ્થિતિમાં ભારત આ મુદ્દે પણ પોતાની વાત રાખે તેવી શક્યતા છે.

ગુરુવારે બ્રિક્સ દેશોના વિદેશ પ્રધાનોની બેઠકની જાહેરાત કરતાં ચીનના વિદેશ મંત્રાલયના પ્રવક્તા વાંગ વેનબિને જણાવ્યું હતું કે અન્ય ઊભરતાં બજારના દેશોના વિદેશ પ્રધાનો સાથે પણ બ્રિક્સ-પ્લસ વાટાઘાટો યોજાશે. જો કે વાંગે બ્રિક્સ પ્લસ સંવાદમાં ભાગ લેનારા દેશોના નામ શેર કર્યા ન હતા, પરંતુ આર્જેન્ટિનાએ ગયા અઠવાડિયે જાહેરાત કરી હતી કે તેને બંને બેઠકોમાં ભાગ લેવા આમંત્રણ આપવામાં આવ્યું છે.

જ્યારે વિદેશ મંત્રીઓની બેઠક માટે ચીનની અપેક્ષાઓ પર ટિપ્પણી કરવા માટે પૂછવામાં આવ્યું ત્યારે વાંગે યુક્રેનમાં ચાલી રહેલા યુદ્ધનો ઉલ્લેખ કર્યો ન હતો, પરંતુ કહ્યું હતું કે બ્રિક્સ અધ્યક્ષ તરીકે, ચીન નવા પડકારો પર બ્રિક્સ ભાગીદારો સાથે સંચાર અને સંકલન વધારવા માટે આતુર છે.