Gujarati News

Gujarati News

News of Monday, 17th September 2018

ગોવાના ૧૦ જેટલા સ્થળોઅે જતા પહેલા લોકો ૧૦ વખત વિચારે છેઃ બોરિસ બ્રિજમાં યુવતી પાણીમાં કુદતી હોય તેવો અવાજ આવે છે

ગોવાનું નામ આવે એટલે તમારા મનમાં મસ્તી, બીચ, પબ, ડાન્સ, ફૂડ, નાઈટલાઈફ વગેરે વગેરે આવે તે સ્વાભાવિક છે. પરંતુ ગોવામાં સુંદર દરિયાકિનારા અને આર્કિટેક્ચરની સાથે સાથે અમુક જગ્યાઓ એવી પણ છે જ્યાં જતા પહેલા લોકો 10 વાર વિચાર કરે છે.

બોરિમ બ્રિજ

લોકોનું માનવુ છે કે ગોવાના બોરિમ બ્રિજને ક્રોસ કરતી વખતે કોઈ યુવતી પાણીમાં કૂદતી હોય તેવો અવાજ આવે છે. જો કોઈ વ્યક્તિ ગાડીમાંથી ઉતરીને પાણીમાં જુએ તો ત્યાં કંઈ જ નથી દેખાતુ. લોકોનું કહેવુ છે કે, ઘણી વાર તો એમ લાગે છે જાણે ગાડીમાં કોઈ યુવતી આવીને બેસી ગઈ હોય. અડધી રાત પછી અહીં જવાની હિંમત કોઈ નથી કરતું. લગભગ જેટલા લોકોએ આ આત્માને જોઈ છે તે લોકો પછી બીમાર થઈ ગયા છે.

થ્રી કિંગ ચર્ચ

ચર્ચ એક એવું સ્થળ છે જ્યાં લોકો પોતાની સલામતી માટે પ્રાર્થના કરતા હોય છે. પરંતુ ગોવાનું આ ચર્ચની વાત થોડી અલગ છે. લોકોનું કહેવું છે કે અહીં કોઈ અદ્રશ્ય શક્તિનો અનુભવ થાય છે. એક પૌરાણિક કથા અનુસાર, એક રાજા આખું રાજ્ય ઈચ્છતો હતો માટે તેણે બે રાજાઓની હત્યા કરી નાખી. ત્યારપછી સાર્વજનિક રીતે વિરોધ થવાને કારણે તેણે ઝેર ખાઈ લીધું. ત્યારપછી 3 રાજાઓની આત્મા અહીં ભટકે છે. સ્થાનિકો અને ટૂરિસ્ટ્સે અહીં અજીબોગરીબ અવાજોનો અનુભવ કર્યો છે.

સલિગાંવ

સલિગાંવમાં એક વડનું વૃક્ષ છે. લોકો આ ઝાડ પાસે જવાનું ટાળે છે. કહેવાય છે કે ઝાડ પર ક્રિસ્ટેલિના નામની એક મહિલાની આત્મા ભટકે છે. એક વાર ચર્ચના પાદરી ગામમાંથી પસાર થઈ રહ્યા હતા ત્યારે આત્માને જોઈને બેભાન થઈ ગયા હતા અને બીજા દિવસે ઉઠ્યા ત્યારે તેના નામની બુમો પાડવા લાગ્યા.

NH 17

મુંબઈ-ગોવા હાઈવો તો ફેમસ છે. આ રસ્તો અત્યંત સુંદર છે, પરંતુ લોકોનું કહેવુ છે કે સૂર્યાસ્ત પછી આ રોડ પરથી પસાર થાઓ તો પોતાની સાથે માંસ ન રાખો. એક વ્યક્તિનું કહેવું છે કે, તે એકવાર આ રસ્તા પરથી પોતાના પત્ની સાથે ડ્રાઈવ કરીને પસાર થઈ રહ્યો હતો. તેમની સાથે ખાણીપીણીનો સામાન હતો જેમાં નોનવેજ ફૂડ પણ હતું. એકાએક તેમની કારની લાઈટ ઓન-ઓફ થવા લાગી અને ગાડી પરથી કંટ્રોલ પણ બગડતું ગયું.

બૉયટાખોલ

બૉયટાખોલ રોડ એક એવી જગ્યા છે જ્યાં દિવસે પણ શેતાની આત્માઓની હેરાનગતિ ચાલુ જ હોય છે. અહીંથી પસાર થનારા અમુક લોકોનું કહેવું છે કે તેમણે બપોરના સમયે પણ અહીં ડારમણી ઘટનાઓનો અનુભવ કર્યો છે. જેમ કે એક મહિલા સફેદ સાડીમાં ગાડીની સામે આવે અને ભયાનક રીતે હસીને બીજી તરફ ભાગી જાય. આનાથી ડ્રાઈવરનું ધ્યાન ભટકી જાય છે.

સેમિનરી આર્ચ

ગોવાના રાચોલ પાસે એક સેમિનરી સ્કૂલ સામે આર્ચ છે. સ્થાનિકોનું કહેવું છે કે, અહીં એક સૈનિકની આત્મા હજી પણ ભટકે છે, જે પોતાનું પદ છોડવા તૈયાર નહોતા. લોકોને યૂનિફોર્મમાં તેમની આત્મા દેખાય છે. તે લોકોને આ સ્થળ પર આવતા રોકે છે. પોર્ટુગલ શાસન સમયથી જ સેમિનરી આર્ચને હોન્ટેડ માનવામાં આવે છે.

રોડરિગ્સ હોમ

હવે આ ઘર વિષે લોકોનું માનવું છે કે તેની બારીઓ અને દરવાજા જાતે જ ખુલે છે અને બંધ થાય છે. એમ લાગે છે કે આ દરવાજા અને બારીઓમાં કોઈ પ્રાણ ફૂંક્યા હોય. કહેવામાં આવે છે કે રૉડ્રિક્સ પરિવાર આજે પણ ત્યાં વસે છે.

(5:53 pm IST)