Gujarati News

મુંબઈ, તા. ૧૭ : ચક્રવાત તૌકતે. વાવાઝોડાનાં કારણે સોમવારે મુંબઇમાં ભારે વરસાદ પડી રહ્યો છે. જોરદાર પવનને કારણે સેંકડો વૃક્ષો ઉમટ્યા હતા અને ઘણી જગ્યાએ પડી ગયા હતા. દરમિયાન વડા પ્રધાન નરેન્દ્ર મોદીએ વાવાઝોડાને લગતી પરિસ્થિતિ અંગે મહારાષ્ટ્રના મુખ્યમંત્રી ઉદ્ધવ ઠાકરે સાથે વાતચીત કરી હતી. મુંબઇમાં વરસાદને કારણે લોકોને પાણી ભરાવાને લીધે ચાલતા-જતામાં મુશ્કેલી પડી રહી છે. ભારે વરસાદ અને પવનને કારણે મુંબઇના શિવસેના ભવન પાસે ઝાડ અને વીજળીના થાંભલા ઉખડી ગયા હતા. દરમિયાન, મુંબઈ એરપોર્ટ પણ બંધ કરી દેવામાં આવ્યું છે. એનસીપી નેતા નવાબ મલિકે કહ્યું કે મહારાષ્ટ્ર સરકાર છેલ્લા ત્રણ દિવસથી વાવાઝોડાને લઇને સાવધ છે. રાજ્ય આપત્તિ વ્યવસ્થાપન ૨૪ કલાક કામ કરી રહ્યું છે. તમામ જિલ્લાઓને જાગ્રત રહેવા આદેશ કરાયો છે. સતત વરસાદ પડી રહ્યો છે અને જોરદાર પવન ફૂંકાઇ રહ્યો છે. બીકેસીનું કોવિડ સેન્ટર અસ્થાયી રૂપે બંધ કરાયું છે. ૧૯૩ દર્દીઓ જેમાંથી ૭૩ દર્દીઓ આઈસીયુમાં હતા તેઓને વિવિધ હોસ્પિટલોમાં ખસેડવામાં આવ્યા છે. આ પહેલા રવિવારે, ભારે પવનને કારણે ઝૂંપડા પર ઝાડ પડતાં બે બહેનોનું મોત નીપજ્યું હતું જ્યારે એક મહિલા ઘાયલ થઈ હતી.

દરમિયાનમાં દેશના દક્ષિણ પશ્ચિમી રાજ્યો પર ચક્રવાતી વાવાઝોડું તૌકતે તબાહી મચાવી રહ્યું છે. કેરળ, કર્ણાટક અને ગોવામાં તબાહી મચાવ્યા બાદ તેની અસર મહારાષ્ટ્રમાં પણ દેખાઈ રહી છે. વાવાઝોડાના એલર્ટ વચ્ચે બીએમસીએ મુંબઈમાં બાંદ્રા-વર્લી સી લિંકને આગામી આદેશ સુધી બંધ કરી દીધો છે. પ્રશાસન અને રાજ્ય સરકાર દ્વારા લોકોને ઘરમાં રહેવાની વિનંતી કરવામાં આવી રહી છે.

આ વાવાઝોડું ગુજરાત તરફ આગળ વધી રહ્યું છે. વિવિધ રાજ્યોના તોફાનથી પ્રભાવિત વિસ્તારોમાં અત્યાર સુધીમાં ૮ લોકોનાં મોત થયા છે અને અનેક ૧૦૦ ઝાડ ધરાશાયી થયા છે. આ ઉપરાંત અનેક ઘરોને પણ નુકસાન પહોંચ્યું છે. મહારાષ્ટ્રમાં પણ ઈમારતોને નુકસાન પહોંચ્યું છે. ગુજરાતના તટીય વિસ્તારોમાં સોમ અને મંગળવારે ભારે વરસાદની આશંકા છે. હોનારતનો સામનો કરવા માટે એનડીઆરએફની ૫૦ ટીમ તૈનાત કરવામાં આવી છે.

મુંબઈમાં ભારે પવન સાથે વરસાદ વરસી રહ્યો છે. હવામાન વિભાગે વરસાદને લઈ ઓરેન્જ એલર્ટ જાહેર કર્યું છે. મુંબઈના વડાલામાં તૌકતે વાવાઝોડાની અસર દેખાવી શરૂ થઈ ગઈ છે અને ભારે પવન સાથે હળવો વરસાદ શરૂ થઈ ગયો છે. વાવાઝોડાના જોખમ વચ્ચે મુંબઈમાં ૫ જગ્યાએ કામચલાઉ શેલ્ટર હોમ બનાવવામાં આવ્યા છે. પશ્ચિમી મુંબઈમાં એનડીઆરએફની ૩ ટીમ અને પૂરથી બચવા માટે ફાયર બ્રિગેડની ૬ ટીમો પણ તૈનાત કરવામાં આવી છે.

પાલઘરના જિલ્લા મેજિસ્ટ્રેટે જણાવ્યું હતું કે નાગરિકોને વિનંતી છે કે તોફાનને કારણે પવન ખૂબ જ તીવ્ર રહેશે અને જોરદાર વરસાદ પણ થવા જઇ રહ્યો છે. જિલ્લામાં હાઈએલર્ટ છે. જેમના કાચા મકાનો છે, તેઓએ પાકું મકાન અથવા જિલ્લા પરિષદની શાળાએ જવું જોઈએ. ઘરની બહાર ન જવું. નોંધપાત્ર વાત એ છે કે અરબી સમુદ્રમાં ત્રાટકેલા આ તોફાનને કારણે રવિવારે કેરળ, કર્ણાટક અને ગોવાના દરિયાકાંઠાના વિસ્તારોમાં વમળ સર્જાયા હતા. વરસાદ અને જોરદાર પવનથી સેંકડો મકાનો નાશ પામ્યા હતા. હજારો લોકોને સલામત સ્થળોએ આશરો લેવો પડ્યો હતો. વાવાઝોડાને લગતા અકસ્માતોમાં ઓછામાં ઓછા છ લોકોનાં મોત નીપજ્યાં હતાં.

પરિસ્થિતિને પહોંચી વળવા કોસ્ટગાર્ડ, નેવી અને એરફોર્સ પણ એનડીઆરએફની ૧૦૧ ટીમો સાથે સ્ટેન્ડબાય પર છે. દરમિયાન કેન્દ્રીય ગૃહ પ્રધાન અમિત શાહે મહારાષ્ટ્ર, ગુજરાત, ગોવાના મુખ્યમંત્રીઓ અને દમણ અને દીવ અને દાદરા નગર હવેલીના તંત્ર સાથે મળીને બચાવની તૈયારી અંગે ચર્ચા કરી હતી. તેમણે તોફાન દરમિયાન કોવિડ હોસ્પિટલો અને ઓક્સિજન પ્લાન્ટની સલામતી માટે અને ઓક્સિજનનો પૂરતો સ્ટોક રાખવા ખાસ વ્યવસ્થા કરવા સૂચના આપી હતી. તે જ સમયે, કેબિનેટ સચિવ રાજીવ ગૌબાએ રાષ્ટ્રીય કટોકટી વ્યવસ્થાપન સમિતિની બેઠક બાદ તૈયારીઓની સમીક્ષા પણ કરી હતી.

તૌકતેના કારણે કેરળમાં ભારે વરસાથી રાજ્યના અનેક ડેમોમાં પાણીનું સ્તર વધવાનું જોખમ છે. રાજ્યના વહીવટી તંત્ર દ્વારા સંભવિત ભય અંગે એલર્ટ કરવામાં આવ્યું છે. કર્ણાટકના ઉત્તરા કન્નડ, ઉડુપી, ચિકમગલુરુ અને શિવમોગામાં એક વ્યક્તિએ જીવ ગુમાવ્યો. વાવાઝોડાથી સાત જિલ્લાના ૭૦ થી વધુ ગામોને અસર થઈ છે.

અનેક સ્થળોએ મકાનો, ઝાડ અને ઇલેક્ટ્રિક થાંભલા પડી ગયા છે. ગોવામાં રવિવાર સવારથી જોરદાર પવન આવવા માંડ્યો હતો. વરસાદ અને વાવાઝોડાને કારણે ઘણા સ્થળોએ ઇલેક્ટ્રિક થાંભલાઓ અને ઝાડ પડી ગયા હતા, અનેક વિસ્તારોમાં વીજ પુરવઠો ખોરવાયો હતો. ગુજરાતમાં નીચા કાંઠા પર રહેતા ૧.૫ લાખ લોકોને સલામત સ્થળોએ ખસેડવામાં આવ્યા છે. મંગળવારે સવાર સુધીમાં પવનની ગતિ વધુ વધી શકે છે.