Gujarati News

હવે ફેસબુક ભારતમાં ટૂંક સમયમાં જ પેમેન્ટ સર્વિસ શરૂ કરવા જઇ રહ્યું છે. FactorDailyનાં રિપોર્ટને આધારે ફેસબુક ભારતમાં પેમેન્ટ સર્વિસનું ટેસ્ટીંગ કરી રહ્યું છે અને આનાં કેમ્પેઇન માટે લોકોની ભરતી પણ કરવામાં આવી રહી છે.

   ફેસબુક આ ફીચર પોતાની મેસેન્જર એપમાં આપશે કે જ્યાંથી યૂઝર્સ મોબાઇલ રિચાર્જ કરી શકશે અને ફેસબુકનાં માર્કેટ પ્લેસથી શોપિંગ કરીને પેમેન્ટ પણ કરી શકશે. તમને જણાવી દઇએ કે આ પહેલા ફેસબુકે મેસેન્જર એપમાં આ પેમેન્ટ ફીચર અમેરિકા, ફ્રાન્સ જેવાં અનેક દેશોમાં આપેલ છે. જો કે હવે આ ફીચરને કંપની ભારતમાં પણ રજૂ કરવા જઇ રહી છે.

   બીજી બાજુ ફેસબુક ભારતમાં વોટ્સએપનાં બીટા વર્ઝન પર યૂપીઆઇ બેસ્ડ પેમેન્ટ ફીચરનું ટેસ્ટિંગ પહેલેથી જ કરી રહ્યું છે. ઉલ્લેખનીય છે કે તાજેતરમાં જ કંપનીએ વોટ્સએપનાં પેમેન્ટ ફીચરમાં મની રિક્વેસ્ટ અને ક્યૂઆર કોડ સ્કેન કરવાનું ફીચર પણ આપેલ છે.

   મહત્વની બાબત એ પણ છે કે તાજેતરમાં જ ફેસબુક દ્વારા ડેટા લીક થયાને વિવાદને લઇ ફેસબુકે દુનિયાભરમાંથી તેને નિંદાઓનો સામનો કરવો પડ્યો હતો. એવામાં હવે જોવાનું એ રહ્યું કે પેમેન્ટ સર્વિસ ભારતમાં લોન્ચ થયા બાદ ફેસબુકને હવે યૂઝર્સ દ્વારા કેવી રીતે રિસ્પોન્સ મળશે.