Gujarati News

લખનૌ તા. ૧૫ : ગુજરાતમાં ઉત્તરપ્રદેશ અને બિહારના લોકો સાથે મારપીટ કરીને તેમને ભગાડવાના મુદ્દે ચર્ચામાં આવનાર કોંગ્રેસના એમએલએ અલ્પેશ ઠાકોરનું માથું કાપીને લાવનારને એક કરોડ રૂપિયાનું ઈનામ આપવાની ઘોષણા કરવામાં આવી છે. મહારાણી પદ્માવતી યૂથ બ્રિગેડ નામના સંગઠને અલ્પેશ ઠાકોરનું માથું કાપીને લાવનારને એક કરોડ રૂપિયાનું ઈનામ આપવાની ઘોષણ સંલગ્ન પોસ્ટર જિલ્લાની સાર્વજનિક જગ્યાઓ પર ચોંટાડી દીધા છે.

આ દરમિયાન પોલીસે તમામ થાણાના આ પ્રકારના પોસ્ટરને તાત્કાલિક હટાવીને અશાંતિ ફેલાવનાર અસામાજિક તત્ત્વો વિરુધ્ધ કાર્યવાહી કરવાનો નિર્દેશ આપ્યો છે. પોતાને મહારાણી પદ્માવતી યૂથ બ્રિગેડની રાષ્ટ્રીય અધ્યક્ષ જણાવતી ભવાની ઠાકુરે કહ્યું કે અલ્પેશ ઠાકોર અને તેના સાથીઓ રાક્ષસી પ્રકૃતિના છે કે જેઓ દબાયેલા ગરીબ મજૂરોની સાથે મારપીટ કરીને કાયરતા દેખાડી રહ્યા છે. આ લોકો દેશને તોડવાનું કામ કરી રહ્યા છે અને તેના વિરોધમાં તમામ લોકોને એકઠા થવાનું કહ્યું છે.

ભવાની ઠાકુરે કહ્યું કે તેમણે અલ્પેશ ઠાકોરના માથા પર એક કરોડ રૂપિયાનું ઈનામ રાખ્યું છે અને વિવિધ જગ્યાઓએ પોસ્ટર લગાવ્યા છે. જો, ઠાકોર ગુજરાતની બહાર નહીં નીકળે તો લોકો ગુજરાત પહોંચીને તેમનું માથું કાપી લાવશે. આ મુદ્દે અપર પોલીસ અધીક્ષક અજય પ્રતાપ સિંહે જણાવ્યું કે બહરાઈચમાં આવા પોસ્ટર લગાવવામાં આવ્યા તેની વાત સોશિયલ મીડિયા પર આવી રહી છે, જેને ગંભીરતાથી લેવામાં આવશે. તેમણે કહ્યું કે અસામાજિક અને ઉપદ્રવી તત્ત્વોને અશાંતિ ફેલાવતા રોકવા માટે અમે કટિબધ્ધ છે.