Gujarati News

લંડનઃ બ્રિટનની સરકારે દેશની યુનિવર્સિટીઝમાં વિઝા એપ્લિકેશન પ્રક્રિયા સરળ બનાવવા માટે તૈયાર કરેલી નવી યાદીમાં ભારતીય વિદ્યાર્થીઓને અલગ રાખ્યા છે. સરકારના આ નિર્ણયની ટીકા થઈ રહી છે. શુક્રવારે દેશની ઇમિગ્રેશન પૉલિસીમાં ફેરફારોને સંસદમાં રજૂ કરવામાં આવ્યા હતા.

બ્રિટનના ગૃહ મંત્રાલયે લગભગ 25 દેશોના વિદ્યાર્થીઓ માટે ટિયર-4 વિઝા કેટેગરીમાં ઢીલ મૂકવાની જાહેરાત કરી છે. આ યાદીમાં અમેરિકા, કેનેડા અને ન્યૂ ઝીલેન્ડ જેવા દેશ પહેલેથી જ સામેલ છે. ગૃહ મંત્રાલયે હવે આ યાદીમાં ચીન, બહેરીન અને સર્બિયા જેવા દેશોનો સમાવેશ કરી દીધો છે. આ દેશોના વિદ્યાર્થીઓને બ્રિટનની યુનિવર્સિટીઝમાં પ્રવેશ માટે શિક્ષણ, નાણાકીય અને અંગ્રેજી ભાષા જેવા માપદંડો મામલે હળવી તપાસમાંથી પસાર થવું પડશે.

આ નવો નિયમ છ જુલાઈથી અમલમાં આવશે અને તેનો ઉદ્દેશ વિદેશી વિદ્યાર્થીઓ માટે બ્રિટનમાં અભ્યાસને સરળ બનાવવાનો છે. જોકે આ નવી યાદીમાં ભારતનો સમાવેશ કરવામાં આવ્યો નથી. તેનો અર્થ એ છે કે, સમાન અભ્યાસક્રમો માટે અરજી કરનારા ભારતીય વિદ્યાર્થીઓએ કઠીન પરીક્ષા, તપાસ અને દસ્તાવેજી પ્રક્રિયામાંથી પસાર થવું પડશે. યુકે કાઉન્સિલ ફોર ઇન્ટરનેશનલ સ્ટુડન્ટ અફેર્સ (યુકેસીઆઈએસએ)ના અધ્યક્ષ લોર્ડ કરણ બિલમોરિયાએ સરકારના આ નિર્ણયને ભારતનું ‘અપમાન’ ગણાવ્યું છે. તેમણે કહ્યું છે કે, આ ઇમિગ્રેશન માટેની બ્રિટનની આર્થિક નિરક્ષરતા અને પ્રતિકૂળ વલણનું ઉદાહરણ છે.

બિલમોરિયાએ કહ્યું છે કે, ‘આ નિયમ સીધી રીતે ભારતનું અપમાન છે અને આ સરકારે તેને ખોટી રીતે લીધું છે. જોકે યુકે ગૃહ સચિવ સાજિદ જાવિદે સરકારની નવી નીતિઓની પ્રશંસા કરી છે. યુકેના નેશનલ ઇન્ડિયન સ્ટુડન્ટ્સ એન્ડ એલ્યુમની યુનિયને આ નિર્ણયો અંગે નારાજગી વ્યક્ત કરી છે. યુનિયને કહ્યું છે કે, ભારતીય વિદ્યાર્થીઓ માટે આ ન્યાયપૂર્ણ નથી. ભારતીય વિદ્યાર્થીઓને ચીન કે અન્ય દેશોની સરખામણીએ અલગ રીતે ટ્રીટ કરવામાં આવશે.