Gujarati News

નવી દિલ્હી તા. ૧૬ : જો તમારા ખાતામાં અચાનક જ એક નહીં પરંતુ બે-બે વખત નાણા જમા થઈ જાય તો તમે જરૂર ચકિત થઈ જશો. પશ્ચિમ બંગાળના બર્ધમાન જિલ્લામાં પણ કંઈક આવું જ બની રહ્યું છે, અહીં લોકોના ખાતામાં અચાનક જ મોટી રકમ જમા થઈ ગઈ છે અને લોકોએ તેને ઉપાડવા માટે લાઈન લગાવી દીધી છે. જોકે, આ પૈસા કયાંથી આવી રહ્યા છે, કોણે મોકલ્યા છે તેના અંગે કોઈ જાણતું નથી.

પશ્ચિમ બંગાળના પૂર્વ બર્ધમાન જિલ્લાના કેતુગ્રામ-૨ નંગર પંચાયત સમિતિ અંતર્ગત આવતા શિબલૂન, બેલૂન, ટોલાબાડી, સેનાપાડા, અમ્બાલગ્રામ, નબગ્રામ અને ગંગાટીકુરી જેવા અનેક નાના-નાના ગામડાઓમાં રહેતા લોકોના ખાતામાં અચાનક જ મોટી રકમ જમા થવા લાગી છે.

જે લોકોના ખાતામાં પૈસા આવ્યા છે તે રકમ રૂ.૧૦ હજારથી રૂ.૨૫ હજાર સુધીની છે. આ પૈસા યુકો બેન્ક, યુનાઈટેડ બેન્ક ઓફ ઈન્ડિયા અને એસબીઆઈના ખાતાધારોકોના ખાતામાં આવી રહ્યા છે. આ અંગે જયારે બેન્ક મેનેજરને પુછ્યું તો તેમણે પણ લોકોના ખાતામાં પૈસા જમા થયા હોવાની વાતને સમર્થન આપ્યું છે. જોકે, પૈસા કયાંથી આવી રહ્યા છે તેના અંગે તેમણે જણાવ્યું કે, અમે એ જણાવી શકીએ નહીં. તેમણે એટલું જ જણાવ્યું કે, પૈસા ઉપાડવા માટે તેમની બેન્કોની બહાર ગ્રામીણોની લાઈન લાગી છે.

લોકોના ખાતામાં આ રકમ NEFT દ્વારા આવી રહી છે. કેતુગ્રામના ધારાસભ્ય શેખ શાહનવાઝે મહેણુ મારતા જણાવ્યું કે, 'વડા પ્રધાને કહ્યું હતું કે, આપકે એકાઉન્ટ મેં પૈસે આએંગે. કદાચ ત્યાંથી જ આવ્યા હોય.' કેટલાક ગ્રામીણો પણ સરકાર દ્વારા આ રકમ જમા કરાવાઈ હોવાનું માની રહ્યા છે.

જોકે, સમગ્ર ઘટનાક્રમ પાછળ સત્ય ઘટના શું છે તેના અંગે વહીવટી તંત્ર પણ અજાણ છે. કટવા સબ ડિવિઝનના અધિકારી સોમેન પલને આ અંગે પુછવામાં આવ્યું તો તેમણે જણાવ્યું કે, હજુ આ ઘટના પાછળ તપાસ કરવાની બાકી છે.

અચાનક જ ખાતામાં મોટી રકમ જમા થઈ જવાને કારણે ગ્રામીણો તો ખુશ થઈ ગયા છે. તેમણે બેન્કોની બહાર મફતમાં જમા થયેલા આ પૈસા ઉપાડવા માટે લાઈનો લગાવી દીધી છે. બેન્ક અધિકારીઓ સહિતના તમામ લોકો આશ્ચર્યચકિત છે કે, આખરે ગરીબ પરિવારના લોકોના ખાતામાં આટલી મોટી રકમ કયાંથી જમા થઈ રહી છે.(૨૧.૬)